-
-
پاکستان کے سب سے بڑے شہر کراچی میں 5 کروڑ امریکی ڈالر گھروں میں چھپائے جانے کا انکشاف ہوا ہے جس میں کراچی کا اولڈ سٹی ایریا سرفہرست ہے۔
ملک بھر میں ڈالر چھپانے اور اسمگلنگ کرنے والوں کے خلاف قانون نافذ کرنے والے اداروں کی کارروائیاں جاری ہیں اور اسی کارروائی کے دوران انکشاف ہوا ہے کہ کراچی میں لوگوں نے 5 کروڑ ڈالر کے قریب گھروں میں چھپا رکھے ہیں۔
جیو نیوز کی رپورٹ کے مطابق حساس اداروں نے مختلف بینکوں اور منی چینجرز کا ریکارڈ حاصل کررکھا ہے اور امریکی ڈالر سمیت دیگر غیر ملکی کرنسی کی خرید و فروخت میں ملوث افراد کی فہرستیں بھی مرتب کرلی گئی ہیں۔
غیر ملکی کرنسی کو انویسٹمنٹ سمجھ کر خریدنے والے کراچی سے تعلق رکھنے والے سرمایہ کاروں نے تاحال 50 ملین سے زائد امریکی ڈالر اور دیگر غیر ملکی کرنسی واپس جمع نہیں کرائی ہے۔
ایسے مافیاز کی فہرستوں میں شامل افراد کراچی کے اولڈ سٹی ایریا کے علاقے لیاری، کھارادر، میٹھادر، صدر، باتھ آئی لینڈ، کلفٹن، ڈیفنس اور دیگر علاقوں کے رہائشی بتائے جاتے ہیں۔ اس سلسلے میں مرتب فہرستوں میں شامل افراد کے گھروں پر ٹارگٹڈ کارروائیاں شروع کی جاچکی ہیں۔
