-
-
کراچی سمیت ملک بھر میں آج مظلوم فلسطینیوں سے اظہار یکجہتی اور مسجد اقصٰی میں ہونے والی صیہونی جارحیت کے خلاف عالمی یوم القدس منایا جارہا ہے۔
کراچی میں تحریک آزادی القدس کی جانب سے یوم القدس کی مرکزی ریلی نمائش چورنگی سے تبت سینٹر تک نکالی جائے گی۔ مرکزی ریلی سہ پہر 3 بجے شروع ہوگی۔
تحریک آزادی القدس کے ترجمان کا کہنا ہے کہ عالمی یوم القدس کی تمام تیاریاں مکمل کرلی گئی ہیں۔ علاقائی سطح پر اس سلسلے میں مظاہرے کئے جارہے ہیں جبکہ مرکزی ریلی سہ پہر 3 بجے نمائش چورنگی سے نکالی جائے گی۔
کراچی میں یوم القدس کی مرکزی ریلی کے لئے سیکیورٹی اور ٹریفک پلان جاری کردیا گیا ہے۔ ایم اے جناح روڈ کو نوائے وقت سے تبت سینٹر تک بند کردیا گیا ہے۔ مخصوص پاس والی گاڑیوں کو ریلی کے مقام پر جانے کی اجازت ہے۔
پانچ سو سے زائد سے زائد امامیہ اسکاوٹ اور رضاکار پولیس اور رینجرز کے ہمراہ فرائض انجام دے رہے ہیں، ایس ایس پی ایسٹ کا کہنا ہے کہ ریلی کی سیکیورٹی پر تقریبا 2 ہزارسیکیورٹی اہلکار تعینات ہوں گے۔
تبت سینٹر پر اختتامی جلسے کے لئے اسٹیج قائم کیا گیا ہے۔ ترجمان نے کراچی کے باسیوں سے آزادی بیت المقدس ریلی میں بھرپور شرکت کی اپیل کی ہے۔
ٹریفک پولیس کے مطابق ریلی کے روٹ کی اطراف کی تمام سڑکوں کو کنٹینرز لگا کر بند کیا جارہا ہے اور ٹریفک کے لئے متبادل راستے رکھے گئے ہیں۔
پولیس نے مزید بتایا کہ نمائش آنے والے ٹریفک کو سولجر بازار کی جانب موڑا جائے گا اور تبت سینٹر سے ٹریفک کو نیو ایم اے جناح روڈ اور لکی اسٹاربھیجا جائے گا۔ ریلی کے اختتام پر تمام روڈ کھول دیے جائیں گے۔
