-
-
پاکستان کے سب سے بڑے شہر کراچی میں کسٹمز نے کارروائی کرکے اسمگل شدہ سامان کی بڑی کھیپ پکڑلی۔ برآمد کی گئی اشیاء کی مالیت پاکستانی کرنسی میں 7 کروڑ روپے کے قریب بنتی ہے۔
جیو نیوز کی رپورٹ کے مطابق پاکستان کسٹم انفورسمنٹ کلیکٹریٹ کراچی کے اینٹی اسمگلنگ اسکواڈ نے خفیہ اطلاع پر کارروائی کی۔
کراچی کے اولڈسٹی ایریا کے علاقے میٹھادر اور شاہراہ لیاقت پر کی جانے والی کارروائی کئی گھنٹے تک جاری رہی۔ ترجمان پاکستان کسٹمز کے مطابق ٹیم نے میٹھادر کے علاقے میں ایک گودام پر چھاپہ مارا۔
رپورٹ کے مطابق پاکستان کسٹمز کے اینٹی اسمگلنگ اسکواڈ نے کارروائی میں 7 کروڑ روپے مالیت کی اشیاء ضبط کی ہیں جس میں غیر ملکی سگریٹ، بھارتی گٹکا اور فلیوورڈ تمباکو شامل ہے۔
ترجمان کے مطابق ضبط شدہ سامان کسٹمز کے اینٹی اسمگلنگ اسکواڈ سیل منتقل کر دیا گیا ہے۔ ملزمان کے خلاف کسٹمز ایکٹ کے تحت مقدمہ درج کر لیا گیا ہے اور قانونی کارروائی کی جا رہی ہے۔
