-
-
شہرقائد میں دودھ کی قیمتوں میں ایک بار پھر اضافہ کردیا گیا۔ ڈیری فارمرز نے دودھ کی قیمت میں 10 روپے فی لیٹر اضافہ کردیا۔
میڈیا رپورٹس کے مطابق کراچی میں قیمتوں میں اضافے کے بعد دودھ کی فی لیٹر ڈیری فارم قیمت 190 روپے ہوگئی جبکہ فی لٹر دودھ کی خوردہ قیمت 10 روپے اضافے سے 220 روپے ہو گئی۔
صدر ڈیری فارمرز ایسوسی ایشن شاکر عمر گجر کے مطابق دودھ کی قیمت میں حالیہ اضافے کا اطلاق فوری کر دیا گیا ہے، شہر کے مختلف علاقوں میں فی لٹر دودھ 220 سے 230 روپے میں فروخت ہو رہا ہے۔
کمشنر کراچی کی جانب سے 16 دسمبر کو فی لٹر دودھ کی سرکاری قیمت 10 روپے اضافے سے 180 روپے مقرر کی گئی تھی، فی لٹر دودھ کا ڈیری فارم ریٹ 163 روپے، ہول سیلرز کا ریٹ 170 روپے مقرر کیا گیا تھا۔
کراچی شہرمیں فی لٹر دودھ سرکاری قیمت سے 40 سے 50 روپے مہنگا فروخت کیا جا رہا ہے، دودھ فروشوں کی جانب سے فی لٹر دودھ کی قیمت میں غیرقانونی اضافے کے باوجود انتظامیہ کارروائی سے گریزاں ہے جبکہ شہری مہنگے داموں دودھ کی خریداری پر مجبور ہیں۔
