-
-
کراچی میں مختلف مقامات سے چوری کی جانے والی موٹرسائیکلیں بلوچستان منتقل ہونے کا انکشاف ہوا ہے۔ پولیس نے ایک ملزم کو موٹرسائیکل منتقل کرتے ہوئے رنگے ہاتھوں گرفتار کرلیا۔
اے آر وائی نیوز کی رپورٹ کے مطابق کراچی میں مدینہ کالونی پولیس نے کاروائی کرتے ہوئے موٹرسائیکل لفٹنگ میں ملوث ملزم کو گرفتار کیا جبکہ اسکا ایک ساتھی فرار ہوگیا۔
گرفتار ہونے والے ملزم نے پولیس کو بتایا کہ وہ بلوچستان سے کوسٹر میں بیٹھ کر کراچی آتا ہے اور اسکا ساتھی جمیل موٹرسائیکل لفٹنگ کے لئے اسے ساتھ لے جاتا ہے۔ موٹرسائیکل اٹھانے کے بعد اسے بلوچستان منتقل کردیا جاتا ہے جسکے اسے 2 ہزار روپے ملتے ہیں۔
پولیس حکام کا کہنا ہے کہ ملزم کو پہلے بھی گرفتار کیا جاچکا ہے جو ضمانت پر رہا ہوگیا تھا۔ پولیس حکام کے مطابق ملزم کے ساتھی جمیل کی تلاش شروع کردی گئی ہے اسے بھی جلد گرفتار کرلیا جائے گا۔
پولیس کا کہنا تھا کہ ملزم نے اپنے شناختی کارڈ کی الیکٹرونک چپ بھی نکال رکھی تھی تاہم ملزم سے مزید تفتیش جاری ہے۔
واضح رہے کراچی میں رواں سال اسٹریٹ کرائم اور رہزنی کی وارداتوں میں تشویشناک حد تک اضافہ ہوا ہے۔ پولیس اب تک جرائم پیشہ افراد کو لگام ڈالنے میں ناکام رہی ہے۔
سی پی ایل سی کے مطابق کراچی میں 2022 کے ابتدائی دو ماہ میں 7989 موٹرسائیکلیں چوری یا چھینی جاچکی ہیں۔
