-
-
پاکستان کے سب سے بڑے شہر اور معاشی حب کراچی میں مون سون کی شدید بارشوں کے بعد جہاں شہر کی ابتر صورتحال ہے وہیں صحت عامہ کے مسائل بھی پیدا ہونے لگے ہیں۔ شہر میں ڈینگی کے کیسز کی تعداد میں اضافہ ہونے لگا ہے۔
کراچی سمیت سندھ بھر میں بارشوں کے بعد جگہ جگہ پانی جمع ہے۔ پانی کی نکاسی نہ ہونے کے باعث مچھروں کی افزائش میں اضافہ ہوگیا ہے جسکی وجہ سے ڈینگی اور ملیریا بھی پھیلنا شروع ہوگیا ہے۔
سماء نیوز کی رپورٹ کے مطابق محکمہ صحت کا کہنا ہے کہ جولائی کے ماہ میں شہرقائد میں ڈھائی سے بھی زیادہ کیسز رپورٹ ہوئے ہیں۔ اعداد و شمار کے مطابق کراچی میں ماہ جولائی میں 239 ڈینگی کے کیسز سامنے آئے۔
ڈینگی کے ساتھ ساتھ شہر میں ملیریا کے مریض بھی بڑی تعداد میں سامنے آئے ہیں۔ مجموعی طور پر شہر میں جولائی کے ماہ میں 515 ملیریا کے کیسز رپورٹ ہوئے ہیں۔
ملیریا سے کراچی کا ضلع جنوبی سب سے زیادہ متاثر ہے جہاں ملیریا کے 292 کیسز سامنے آئے۔ ضلع وسطی میں 62 ، کورنگی میں 54، ملیر میں 48 اور ضلع غربی میں 59 ملیریا کے کیسز رپورٹ ہوئے۔
رواں سال کراچی میں 867 کیسز رپورٹ ہوئے ہیں جبکہ رواں ماہ حیدرآباد ڈویژن میں 27 اورمیر پورخاص ڈویژن میں 12 کیسز رپورٹ ہوچکے ہیں۔
سندھ بھرمیں ڈینگی کے رواں سال 1154 کیسز رپورٹ ہوئے ہیں۔ ماہرین کا کہنا ہے کہ اسپرےنہ کیاگیاتوڈینگی وبائی شکل اختیارکرسکتا ہے۔
