-
-
پاکستان کے سب سے بڑے شہر کراچی میں اچانک آنے والی گرمی کی لہر نے شہریوں کو پریشان کردیا۔ محکمہ موسمیات نے کراچی میں اگلے دو سے تین روز تک گرمی کی شدید لہر کی پیش گوئی کی ہے۔
محکمہ موسمیات کا کہنا ہے کہ شہر میں موسم آج بھی انتہائی گرم اور مرطوب رہے گا جبکہ اس وقت شہر کا موجودہ درجہ حرارت 37 ڈگری سینٹی گریڈ اور زیادہ سے زیادہ درجہ حرارت 39 ڈگری سینٹی گریڈ تک ریکارڈ ہونے کا امکان ہے۔
محکمہ موسمیات نے بتایا کہ گرمی کی شدت اس وقت 41 ڈگری سینٹی گریڈ تک محسوس کی جارہی ہے جبکہ شہر میں 12 کلو میٹر فی گھنٹہ کی رفتار سے شمالی ہوا چل رہی ہے۔
محکمہ موسمیات نے مزید کہا کہ آئندہ چوبیس گھنٹوں تک شہر میں بارش کا کوئی امکان موجود نہیں ہے۔ سندھ کے چند شہروں میں بارش ہوسکتی ہے۔
محکمہ موسمیات نے بتایا کہ 10 سے 14 ستمبر کے دوران تھرپارکر، عمر کوٹ ، سانگھڑ ، بدین ، میرپور خاص، ٹھٹھہ میں اور 13 اور 14 ستمبر کے دوران لسبیلہ، قلات ،خضدار میں تیز ہواؤں گرج چمک کے ساتھ بارش کا امکان ہے۔
محکمہ موسمیات کا کہنا ہے کہ مغربی ہواؤں کا سلسلہ ملک کے بالائی علاقوں میں 11 ستمبر سے داخل ہوگا اور بالائی و وسطی علاقوں میں وقفے وقفے سے بارش برسے گی۔
