-
-
کراچی میں واٹر بورڈ نے شب برات کے حوالے سے خصوصی انتظامات شروع کر دیے، ایم ڈی واٹر بورڈ انجینئر اسداللہ خان نے کہا ہے کہ 15 شعبان المعظم سے قبل شہر بھر خصوصاً قبرستانوں، مساجد اور ان کے اطراف میں فراہمی و نکاسی آب کے خصوصی انتظامات مکمل کیے جائیں گے۔
واٹر بورڈ عملے نے شہر کے مختلف علاقوں کی مساجد اور قبرستانوں کے اطراف سیوریج لائنوں کی صفائی، ٹوٹے مین ہولز کی تعمیر، دھنسنے والی سیوریج لائنوں کی تبدیلی، فراہمی آب کی لائنوں سے رساؤ کے خاتمے اور دیگر امور تیزی سے شروع کر دیے ہیں۔
ایم ڈی واٹر بورڈ کا کہنا ہے کہ سیوریج کا پانی کسی بھی مقام پر کھڑا نہ ہونے دیا جائے تاکہ قبرستان جانے والوں کو کسی دشواری کا سامنا نہ ہو۔
ایم ڈی واٹر بورڈ نے فوکل پرسن ہائیڈرنٹ سیل کو ہدایت کی کہ شب برأت کے موقع پر قبرستانوں کے داخلی و خارجی راستوں پر زائرین کو پانی فراہم کرنے کیلئے واٹر بورڈ کی جانب سے پانی سے بھرے ٹینکرز کھڑے کئے جائیں۔
واٹر بورڈ کی جانب سے سماجی، مذہبی، تنظیموں کی جانب سے لگائی جانے والی سبیلوں اور مساجد کو بھی پانی فراہم کیا جائے۔
