-
-
کراچی کے مختلف علاقوں میں شہریوں نے آج صبح آنکھ کھولی تو خوشگوار موسم نے انکا استقبال کیا۔ شہرقائد کے بیشتر علاقوں میں صبح سویرے ہلکی بارش ہوئی۔
ملیر، ایئرپورٹ، شاہراہ فیصل ، ناظم آباد ، نارتھ ناظم آباد ، سرجانی ٹاؤن، صدر ، کلفٹن ، لانڈھی ، کورنگی اور سی ویو سمیت مختلف علاقوں میں ہلکی بارش کا سلسلہ گھنٹوں جاری رہا۔
محکمہ موسمیات کے مطابق شہر میں آج مطلع جزوی ابر آلود رہے گا جبکہ شام کے اوقات میں بھی شہر کے مختلف علاقوں میں ہلکی بارش کا امکان ہے۔
محکمہ موسمیات کے چیف میٹرولوجسٹ سردار سرفراز نے بتایا کہ کراچی میں مون سون اسپیل کل رات سے داخل ہونا شروع ہوگا ، جس کے اثرات 24 جولائی تا 26 جولائی شہر میں نظر آئیں گے۔
انہوں نے کہا کہ اسپیل کے دوران کراچی میں گرج چمک کے ساتھ موسلادھار بارش کا امکان ہے اور بارش کے ساتھ آندھی چلنے کے بھی قوی امکانات ہیں۔
محکمہ موسمیات کے مطابق مون سون کے اس سسٹم سے شہر میں 100 ملی میٹر سے زیادہ بارش ہوسکتی ہے جبکہ نشیبی علاقوں میں سیلابی صورتحال بھی پیدا ہوسکتی ہے۔
محکمہ موسمیات کے مطابق اس سسٹم کا زیادہ تر حصہ زمین پر ہونے کے باعث اس کی شدت زیادہ ہے، خلیجِ بنگال سے نم ہوائیں مون سون سسٹم کو مضبوط کر رہی ہیں۔ چیف میٹرولوجسٹ کا یہ بھی کہنا ہے کہ بھارت کے بعد اس سسٹم کو بحیرۂ عرب سے نمی کی سپورٹ رہے گی۔
