-
-
پاکستان کے سب سے بڑے شہر کراچی میں ایک بار پھر اسٹریٹ کرائم بے قابو ہونے لگا۔ شہر میں لوٹ مار کی وارداتوں میں ہر گزرتے دن کے ساتھ اضافہ ہورہا ہے۔
ستمبر کا مہینہ کراچی کے شہریوں کے لئےستم گر بن گیا ہے۔ ڈاکوؤں کی فائرنگ سے رواں ماہ کے چھ دنوں میں ہی 10 افراد جاں بحق ہوچکے ہیں۔
روزنامہ جنگ کی رپورٹ کے مطابق منگل کے روز ڈکیتوں نے نیوکراچی میں ڈکیتی مزاحمت پر ایک اور شہری کی جان لے لی۔ گبول ٹائون تھانے کی حدود نیو کراچی سکیٹر بی 16 فیض مسجد کے قریب ایزی شاپ پر ڈکیتی واردات ہوئی۔
واردات کے دوران ملزمان کی فائرنگ سے 50 سالہ عباس ولد اسحاق نامی دکاندار زخمی ہو گیا۔ زخمی شخص کو فوری طور پر جناح اسپتال منتقل کیا گیا جہاں وہ دوران علاج دم توڑ گیا۔
عباس نامی شہری کے جاں بحق ہونے کے بعد رواں ماہ ڈاکوؤں کی فائرنگ سے جاں بحق ہونے والوں کی تعداد 10 ہوگئی ہے۔ پولیس اب تک کسی بھی کرمنل کو پکڑنے میں کامیاب نہیں ہوسکی ہے۔
پہلے ڈاکو شہریوں سے انکی قیمتی اشیاء لوٹتے تھے تاہم اب وہ شہریوں کی زندگیاں لینے سے بھی دریغ نہیں کر رہے ،رواں برس شہر میں اسٹریٹ کرائم کی 56 ہزار سے زائد وارداتیں ہوئی ہیں،19 ہزار سے زائد شہریوں سے موبائل فون چھینے گئے ہیں۔
پینتیس ہزار سے زائد موٹر سائیکلیں اور 1487 گاڑیاں چھینی اور چوری کی جا چکی ہیں۔رواں برس گھروں میں ڈکیتیوں کے 300 سے زائد واقعات ہو چکے ہیں۔
