کراچی سے سعودی عرب جانے والے پی آئی اے کے طیارے سے منشیات برآمد

کراچی ائیر پورٹ سے سعودی عرب کے شہر دمام جانے والے پی آئی اے کے طیارے پی کے 9245 سے منشیات برآمد ہوئی ہے جس پر سی ای او پی آئی اے نے تحقیقات کا حکم جاری کر دیا ہے۔

 جیو نیوز کے مطابق اے این ایف کسٹمز اورائیر پورٹ سیکیورٹی کی مشترکہ سرچنگ کے دوران طیارے کے ٹوائلٹ سے منشیات برآمد ہوئیں ہیں۔

جہاز کی صفائی پر مامور عملے اور زمینی اسٹاف سے پوچھ گچھ شروع کردی گئی ہے ، ترجمان پی آئی اے کے مطابق ماضی میں ایسے ہونے والے واقعات کے بعد سے جہازوں کی ہر بین الاقوامی پرواز سے پہلے مشترکہ طور پر کڑی چیکنگ کی جاتی ہے۔ مشترکہ ٹیم کی چیکنگ پی آئی اے کے اسٹینڈرڈ آپریٹنگ پروسیجر کا حصہ ہے ۔

ملوث ہونے والے اہلکاروں کی خلاف ضابطے اور پاکستانی قوانین کے تحت سخت ترین کاروائی کی جائیگی۔