-
-
اسلام آباد اور پنجاب کے بعد سندھ میں بھی کاروباری اوقات کار پر پابندیوں کا حکم نامہ وقتی طور پر معطل کردیا گیا۔ محکمہ داخلہ سندھ کی جانب سے عید تک پابندیاں ختم کرنے کا نوٹی فکیشن جاری کردیا گیا۔
محکمہ داخلہ سندھ کے مطابق یہ فیصلہ عید الاضحیٰ کی مناسبت سے کیا گیا ہے۔ عید کے پہلے روز تک دکانیں، مارکیٹس، ہوٹلز، شادی ہالز پر کاروبار جلد بند کرنے کی پابندی ختم کردی گئی۔
محکمہ داخلہ سندھ کے جاری کردہ نوٹی فکیشن کے مطابق 10 جولائی تک رعایت دی گئی ہے۔ کاروباری اوقات کار کی پابندیوں کا نوٹی فکیشن 11 جولائی سے ایک بار پھر نافذ العمل ہوجائے گا۔
واضح رہےکہ سندھ حکومت نے سب سے پہلے توانائی بحران پرقابو پانےکے لیےکاروباری اوقات کار کی پابندیوں کا اعلان کیا تھا۔ سندھ میں صرف ہفتے کے روز کاروباری اوقات پر پابندی کا اطلاق نہیں ہوتا۔
دیگر ایام میں مارکیٹیں اور بازار رات 9 بجے جبکہ ہوٹل، ریسٹورینٹ اور دیگر کھانے پینے کی دکانیں رات ساڑھے 11 بجے بند کرنی ہوتی ہیں۔
سندھ میں پابندی کے باوجود توانائی بحران برقرار ہے اور ملک کا سب سے بڑا شہر کراچی ان دنوں بدترین لوڈ شیڈنگ کی لپیٹ میں ہے جہاں رات کے اوقات میں بھی دو دو مرتبہ لوڈ شیڈنگ کی جارہی ہے۔
