کراچی روشنیوں کا شہر ہے، ٹرانسپورٹ کے نظام کو جدید اور شہر سے ٹینکر مافیا کا خاتمہ کریں گے، شہباز شریف

پاکستان مسلم لیگ (ن) کے صدر اور سابق وزیراعظم شہباز شریف نے کہا ہے کہ کراچی سے ٹینکر مافیا کاخاتمہ کریں گے، کراچی میں ٹرانسپورٹ کے نظام کو جدید بنائیں گے۔

کراچی میں میڈیا سے بات کرتے ہوئے ان کا کہنا تھا کہ کراچی روشنیوں کا شہر ہے، ملکی معیشت میں کراچی اہم کردار ادا کررہا ہے، کراچی کی معیشت ملکی معیشت کا نصف ہے، سابق وزیراعظم اور مسلم لیگ (ن) کے قائد نواز شریف نے ہمیشہ کراچی کو اہمیت دی۔

ان کا کہنا تھا کہ نوازشریف سے دھاندلی سے اقتدار چھینا گیا، مسلم لیگ (ن) کے قائد نے صوبائی حکومت کے ساتھ مل کر بدامنی کو ختم کیا۔ کراچی کے تاجر، صنعتکار حلال کی کمائی سے ٹیکس ادا کرتے ہیں، کراچی میں گرین لائن منصوبہ شروع کیا گیا۔

مسلم لیگ (ن) کے صدر نے کہا کہ کراچی کا امن 1993 میں تباہ ہوچکا تھا، کراچی میں بھتہ خوری تھی، پرچی سسٹم چلتا تھا، نوازشریف نےصوبائی حکومت کےساتھ مل کربدامنی کو ختم کیا۔ ان کا کہنا تھا کہ نواز شریف کو اقتدار سے نہ ہٹایاجاتا توکراچی حیدرآباد موٹروے مکمل ہوچکا ہوتا۔

ان کا کہنا تھا کہ پاکستان کے دیگر شہروں کے لوگ بھی کراچی میں رہتے ہیں، کراچی پاکستان کا گیٹ وے کہلاتا ہے۔ شہباز شریف نے کہا کہ پانی کی فراہمی کے لیے کے3 اور کے4 منصوبے دیے۔

شہباز شریف نے کہا کہ کراچی سے ٹینکر مافیا کاخاتمہ کریں گے، کراچی میں ٹرانسپورٹ کے نظام کو جدید بنائیں گے۔

Hurmat Majid