-
-
کراچی پولیس چیف غلام بنی میمن کا کہنا ہے کہ کراچی کے علاقے صدر میں ہونے والے دھماکے میں ابتدائی طور پر کوسٹ گارڈ کی گاڑی کو نشانہ بنانے کے شواہد نہیں ملے ہیں۔
ایڈیشنل آئی جی کراچی غلام نبی میمن کا میڈیا سے گفتگو کرتے ہوئے کہنا تھا کہ صدر دھماکے سے متعلق مختلف پہلوؤں سے تفتیش کی جا رہی ہے، پاکستان کوسٹ گارڈ کی گاڑی کو نشانہ بنایا گیا ہے یا نہیں تفتیش کر رہے ہیں۔
غلام نبی میمن کا کہنا تھا کہ کوسٹ گارڈ کی گاڑی روزانہ یہاں سے نہیں گزرتی تھی، گاڑی میں ایک ڈرائیور اور کوسٹ گارڈ کے 2 اہلکار موجود تھے، گاڑی میں موجود تمام افراد محفوظ رہے۔
ایڈیشنل آئی جی غلام نبی میمن نے مزید کہا کہ گاڑی صدر سے گارڈن کی جانب جا رہی تھی، کوسٹ گارڈ کی گاڑی کی ریکی کے بھی شواہد نہیں ملے۔
ان کا کہنا ہے ابتدائی طور پر لگتا ہے کہ دھماکا ٹائم ڈیوائس سے کیا گیا تاہم تفتیش کر رہے ہیں کہ ریموٹ کنٹرول بم تھا یا ٹائم ڈیوائس سے دھماکا کیا گیا۔مختلف سی سی ٹی ویڈیوز حاصل کی گئی ہیں، ویڈیوز کا بغور جائزہ لے رہے ہیں۔
واضح رہے گزشتہ روز کراچی کے علاقے صدر میں ہونے والے زور دار دھماکے کے نتیجے میں ایک نوجوان جاں بحق ہوا جبکہ 13 افراد زخمی ہوئے۔
