-
-
پاکستان تحریک انصاف کی جانب سے 25 مئی کو نکالے جانے والے لانگ مارچ کے سلسلے میں ملک بھر کے شہروں میں احتجاجی مظاہرے اور دھرنے دئے جائیں گے۔
اے آر وائی نیوز کی رپورٹ کے مطابق پی ٹی آئی کراچی کے صدر بلال غفار کا کہنا ہے کہ ملک کے سب سے بڑے شہر کراچی میں نمائش چورنگی کے مقام پر دھرنا دیا جائے گا۔
صدر پی ٹی آئی کراچی کے مطابق شہر کے دیگر مقامات کو بند کرنے کا فیصلہ بعد میں صورتحال کے مطابق کیا جائے گا۔ کراچی میں نمائش چورنگی پر دھرنا دینے کی منصوبہ بندی پی ٹی آئی کراچی کے اجلاس میں کی گئی ہے۔
احتجاج میں کارکنان کےعلاوہ فیملیز کی بھر شرکت ہوگی تاہم قیادت کی ممکنہ گرفتاری اور احتجاج کا پلان بی اور سی بھی ترتیب دیا گیا ہے۔ اسلام آباد لانگ مارچ کی سرگرمیاں براہ راست اسکرین پر دکھائی جائیں گی اور بلال غفار کراچی میں لانگ مارچ کے اجتماع کی قیادت کریں گے۔
بلال غفار نے کہا کہ ہمارے دورمیں اسلام آباد میں 5لانگ مارچ آئے جنہیں نہیں روکا گیا، 25 مئی کوعمران خان کالانگ مارچ جمہوری اورجائز ہے ، پاکستان کےعوام رجیم چینج آپریشن کوکسی قیمت پرقبول نہیں کررہے۔
پی ٹی آئی کراچی کے صدر کا کہنا تھا کہ لانگ مارچ کیلئے کراچی میں بھی عوامی احتجاج کیا جائے گا، کراچی کے شہری اس انقلاب کا حصہ بننےکیلئے شریک ہوں، مارچ روکنےکی کوشش جمہوریت کاقتل کرنےکے مترادف ہوگا۔
