-
-
پاکستان سپرلیگ کے دلچسپ اور سنسنی خیز میچز کا سلسلہ جاری ہے۔ میگاایونٹ میں کراچی کنگز اور ملتان سلطانز کی ٹیمیں آمنے سامنے ہوں گی۔
پی ایس ایل 8 میں آج ملتان سلطانز کی ٹیم ہوم گراؤنڈ پر آخری میچ کھیلے گی۔ ملتان کرکٹ اسٹیڈیم میں شیڈول میچ پاکستانی وقت کے مطابق شام چھ بجے شروع ہوگا۔ پی ایس ایل کے رواں سیزن میں ملتان نے 5 میچز کی میزبانی کی اور ملتان سلطانز کو اپنے تمام ہوم میچز ہوم گراؤنڈ پر ہی کھیلنے کا موقع ملا۔
پی ایس ایل 8 میں کراچی کنگز اور ملتان سلطانز کی ٹیمیں 4 ، 4 میچز کھیل چکی ہیں۔ ملتان کی ٹیم کو لیگ کے افتتاحی میچ میں شکست ہوئی لیکن اسکے بعد ملتان نے اگلے تینوں میچز میں کامیابی حاصل کرکے فتوحات کی ہیٹرک کی۔
دوسری جانب کراچی کنگز کو لیگ کے ابتدائی تینوں میچز میں شکست ہوئی جسکے بعد روایتی حریف لاہور قلندرز کے خلاف میچ میں کراچی کنگز نے 67 رنز کے بڑے مارجن سے میدان مارا۔
پی ایس ایل کی تاریخ میں کراچی کنگز اور ملتان سلطانز کی ٹیمیں 11 میچز میں مدمقابل آچکی ہیں۔ دونوں ٹیموں نے چار چار میچز میں کامیابی حاصل کی ہے۔
کراچی کنگز اور ملتان سلطانز کے درمیان ایک میچ ٹائی بھی ہوا جسکے بعد سپر اوور میں کراچی کنگز نے کامیابی حاصل کی۔ دونوں ٹیموں کے درمیان 2 میچز بارش کے باعث منسوخ بھی ہوئے ہیں۔
