-
-
پاکستان میں مون سون بارشوں کے نتیجے میں آنے والے سیلاب سے متاثر ہونے والے افراد کی مدد کیلئے دوست ملک چین بھی آگے آگیا۔ چین نے سیلاب متاثرین کے لئے امدادی سامان روانہ کردیا۔
پاکستان میں شدید بارشوں کے بعد ملک کے بیشتر اضلاع میں تباہی مچ چکی ہے۔ سیلاب کے باعث ہزاروں خاندان بے سروسامان کھلے آسمان تلے بے یاردو مددگار امداد کے منتظر ہیں۔
گزشتہ روز چین نے پاکستان میں سیلاب متاثرین کیلئے 4 ہزار خیمے، 50 ہزار کمبل اور 50 ہزار واٹر پروف شیٹیں دینے کا اعلان کیا اور آج یہ تمام سامان چین سے روانہ کردیا گیا ہے۔
China will provide a batch of emergency humanitarian supplies, including 25,000 tents and other supplies in dire need, as well as USD 300,000 emergency cash assistance to the flood-affected Pakistan People in times of need. Chin-Pak Dosti Zindabad!#ironbrothers
— Chinese Emb Pakistan (@CathayPak) August 24, 2022
چینی وزارت خارجہ کا کہنا ہے کہ ہم متاثرین کے ساتھ دلی تعزیت کا اظہار کرتے ہیں، ہمارے دل سوگوار خاندانوں،زخمیوں اور متاثرین کے ساتھ ہیں۔
ترجمان چینی وزارت خارجہ نے مزید کہا ہے کہ چین اور پاکستان سچے دوست اور اچھے بھائی ہیں، ہم بڑی قدرتی آفات کے وقت ایک دوسرے کی مدد کيلئے ہروقت تیار رہتے ہیں۔
چینی وزارت خارجہ نے اعلان کیا کہ چینی ریڈ کراس سوسائٹی 3 لاکھ امریکی ڈالر ہنگامی نقد امداد فراہم کرے گی، 25 ہزار خيموں اور ديگر اشياء کی نئی کھيپ جلد پہنچا دی جائے گی۔
وزارت خارجہ نے مزید کہا کہ چین آفات کی روک تھام، موسمیاتی تبدیلیوں کے خلاف دوطرفہ تعاون کو فروغ دیتا رہے گا، امید ہے کہ پاکستان آفت زدہ علاقوں میں لوگوں کی مشکلات حل کر لے گا۔
واضح رہے پاکستان میں مون سون کا رواں سیزن غیر معمولی حد تک طویل اور تباہ کن رہا ہے۔ اب تک مجموعی اعداد و شمار کے مطابق قریب ڈھائی ماہ کے دوران ملک بھر میں سیلاب اور بارشوں کے باعث کم از کم 830 اموات ہو چکی ہیں اور ملک کے 116 اضلاع متاثر ہوئے ہیں۔
