-
-
انگلینڈ ٹیسٹ ٹیم کے ہیڈ کوچ برینڈن میک کولم کا کہنا ہے کہ پاکستان میں کرکٹ کے لیے بہت جذباتی شائقین ہیں، پاکستان میں اچھی مہمان نوازی کی جا رہی ہے۔
راولپنڈی میں پریس کانفرنس کرتے ہوئے برینڈن میک کولم نے کہا پاکستان میں پہلی بار آکر خوشی محسوس کررہا ہوں،پاکستان میں کئی سال کرکٹ نہیں ہوئی۔ پاکستان کی ایک جینیریشن نے پاکستانی کھلاڑیوں کو اپنے سامنے کھیلتے نہیں دیکھا۔
برینڈن میکولم نے کہا کہ پاکستان میں آئندہ چند ہفتے محظوظ ہو کر کرکٹ کھیلیں گے۔ پاکستان میں کرکٹ سیریز چیلنچنگ ہوگی۔ پنڈی کرکٹ اسٹیڈیم میں فُل ہاؤس کے سامنے کھیلنے کے لیے پرجوش ہیں۔
انگلینڈ کے کوچ نے کہا کہ متحدہ عرب امارات میں دورہ پاکستان کیلئے بہترین کیمپ میں حصہ لیا، پاکستان میں آ کر اچھا لگ رہا ہے، دونوں ٹیموں نے پنڈی کرکٹ اسٹیڈیم میں اچھی ٹریننگ کی ہے۔
برینڈن میک کولم کا کہنا ہے کہ امید ہے مارک ووڈ دوسرے ٹیسٹ میچ میں دستیاب ہوں گے، راولپنڈی ٹیسٹ کے لیے اچھی پچ بننے کی امید کر رہے ہیں۔ آسٹریلیا میں ٹی ٹوئنٹی ورلڈ کپ جیتنے سے کھلاڑیوں کے اعتماد میں اضافہ ہوا ہے، پاکستان میں کرکٹ کھیلنے کے لیے پُرجوش ہیں۔
انگلش کوچ کا مزید کہنا ہے کہ شاہین شاہ آفریدی ایک بہترین فاسٹ بولر ہیں، ان کی عدم دستیابی پاکستان کے لیے بہت بڑا نقصان ہے۔ ان کا یہ بھی کہنا ہے کہ پاکستان کا ٹیسٹ اسکواڈ بہت اچھا ہے جو سینئرز اور جونیئرز کھلاڑیوں پر مبنی ہے۔
