-
-
پاکستان مسلم لیگ ن کے صدر شہباز شریف نے کہا ہے کہ پی ٹی آئی 8 فروری کے عام انتخابات ملتوی کرانے کی سازش کر رہی ہے، انتخابات میں تاخیر ہوئی تو ذمے دار پی ٹی آئی ہو گی۔
شہباز شریف نے اپنے ایک بیان میں کہا ہے کہ پی ٹی آئی کی درخواست عوام کی ترجمانی سبوتاژ کرنے کی سازش ہے، پی ٹی آئی کی درخواستیں الیکشن سے فرار کی منصوبہ بندی ہے۔
ان کا کہنا ہے کہ سائفر کی طرح پی ٹی آئی 8 فروری کے عام انتخابات کے خلاف سازش کر رہی ہے، پی ٹی آئی ہمیشہ کی طرح دوغلی، دہری اور منافقانہ پالیسی پر کاربند ہے۔
سابق وزیراعظم کا کہنا تھاکہ 2018 میں انتخابات ڈی آر اوز اور آر اوز کی ذمہ داری بیورو کریسی نے ہی نبھائی تھی۔ اس وقت پی ٹی آئی نے اعتراض نہیں کیا اب انکی تعیناتی پر پی ٹی آئی عدالت چلی گئی۔ 8 فروری کے انتخابات میں تاخیر ہوئی تو پی ٹی آئی ذمہ دار ہوگی۔
مسلم لیگ ن کے صدر کا کہنا ہے کہ آئی ایم ایف پروگرام سے متعلق بھی پی ٹی آئی نے ایسی ہی سازش کی تھی، یہ جماعت ملک میں آئینی بحران پیدا کر کے سیاسی عدم استحکام چاہتی ہے۔
شہباز شریف کا یہ بھی کہنا ہے کہ پی ٹی آئی نہیں چاہتی کہ ملک معاشی طور پر مضبوط ہو اور عوام کی معاشی مشکلات ختم ہوں۔
