-
-
سن 1997 میں ریلیز ہونے والی ہالی ووڈ کی شہرہ آفاق فلم ٹائی ٹینک میں مرکزی کردار ادا کرنے والی ہیروئن کیٹ ونسلیٹ کو بچانے والے تختے کو نیلام کردیا گیا اور یہ تختہ 20 کروڑ روپے سے زائد میں نیلام ہوا ہے۔
ٹائی ٹینک فلم 1997 میں ریلیز ہوئی تھی اور اپنے وقت کی مقبول اور کامیاب ترین فلموں میں سے ایک تھی۔ فلم کے آخر میں ہیروئین روز (کیٹ ونسلیٹ) ایک لکڑی کے تختے پر چڑھ کر بچ جاتی ہے جبکہ ہیرو جیک (لیونارڈو ڈی کیپریو) اس تختے کو پکڑ کر برفیلے پانی میں تیرتے ہوئے ہلاک ہوجاتا ہے۔
فلم کی ریلیز کے بعد کافی بحث بھی چھڑی رہی کہ لکڑی کا وہ تختہ جو روز (کیٹ وینسلیٹ) کو سمندر کے پانی میں ڈوبنے سے بچائے رکھتا ہے، کیا وہ جیک (لیونارڈو ڈی کیپریو) کا بوجھ برداشت کرنے سے قاصر تھا۔
غیرملکی میڈیا رپورٹس کے مطابق لکڑی کا یہ تختہ ٹائی ٹینک جہاز کے فرسٹ کلاس لاؤنج کے داخلی دروازے کے فریم سے نکالا گیا تھا۔ اس لکڑی کے تختے کو اب 7 لاکھ 18 ہزار 750 ڈالر میں نیلام کردیا گیا ہے اور پاکستانی کرنسی میں یہ رقم 20 کروڑ روپے سے بھی زائد بنتی ہے۔
دلچسپ بات یہ ہے کہ کیٹ ونسلیٹ کا فلم میں پہنا گیا لباس اس سے کہیں کم قیمت یعنی ایک لاکھ 25 ہزار ڈالرز میں نیلام ہوا۔
فلم میں دکھایا گیا ہے کہ ہیرو اور ہیروئین اس لکڑی کے تختے پر چڑھنے کی متعدد کوششیں کرتے ہیں، لیکن تختہ صرف ایک فرد کو ہی ڈوبنے سے بچا سکتا ہے۔ لہٰذا جیک اپنی محبوبہ روز کے لیے اس تختے کو چھوڑ دیتا ہے۔
شائقین کو اعتراض تھا کہ ہیرو بھی لکڑی کے اس تختے پر چڑھ کر اپنی جان بچا سکتا تھا۔ 2022 میں ڈائریکٹر جیمز کیمرون نے ان قیاس آرائیوں کو ختم کرنے کے لیے سائنسی بنیادوں پر ایک ٹیسٹ کیا تھا۔
ڈائریکٹر نے بتایا کہ ہائپوتھرمیا ایکسپرٹ کی مدد سے لکڑی کے ٹکڑے کا فارنزک تجزیہ کیا گیا، کیٹ اور لیونارڈو ڈی کے ہم وزن مرد اور خاتون کا انتخاب کیا گیا اور انھیں برفیلے پانی میں چھوڑ دیا گیا، اس سے یہ بات سامنے آئی کہ تختہ صرف ایک فرد کا وزن برداشت کرسکتا تھا۔
