-
-
بھارتی شہر جودھ پور کے رہائشی ارباز خان کی کراچی میں رہنے والی آمنہ کے ساتھ بات طے ہوئی اور نکاح کی تاریخ بھی رکھ دی گئی تھی لیکن پاکستانی ہونے کے باعث آمنہ کو بھارت کا ویزا نہ مل سکا۔
جودھ پور کے رہائشی ارباز اور پاکستان میں موجود آمنہ ایک دوسرے کے رشتے دار ہیں۔ ارباز کے خاندان کے ایک فرد کی شادی بھی پاکستانی لڑکی سے ہو چکی ہے۔
بھارتی میڈیا کے مطابق جودھ پور کے ارباز خان جو پیشے کے لحاظ سے چارٹرڈ اکاؤنٹینٹ ہیں انکی شادی کراچی کی آمنہ کے ساتھ ہوئی۔ دلہا دلہن نے روایتی لباس زیب تن کر رکھا تھا اور دونوں جانب سے اہل خانہ نے بھی مکمل تیاری کے ساتھ شرکت کی لیکن یہ نکاح ویڈیو کانفرنس کے ذریعے ہوا ۔
جودھ پور میں نکاح خوان نے کراچی میں موجود دلہن کا بھارتی دلہے سے نکاح پڑھوایا اور اس کے بعد تمام رسومات بھی ورچوئل ادا کی گئیں۔ الگ الگ فوٹو سیشن بھی ہوئے۔
دلہے ارباز خان نے بھارتی میڈیا سے گفتگو میں کہا کہ دونوں ممالک کے درمیان ابھی حالات ٹھیک نہیں اس لیے ویزہ نہیں ملا لیکن جلد حالات نارمل ہوجائیں گے تو ویزہ ملنے کی امید ہے۔ اب ہم شادی شدہ ہیں تو اس لیے ویزہ ملنے کی امید قوی ہے۔
