-
-
وزیراعظم شہباز شریف نے نجم سیٹھی کو پاکستان کرکٹ بورڈ (پی سی بی) کا چیئرمین بنانے کی منظوری دے دی۔ نجم سیٹھی کی چیئرمین پی سی بی کیلئے نامزدگی کا نوٹی فکیشن جلد جاری کردیا جائے گا۔
میڈیا رپورٹس کے مطابق وزیراعظم کو وزارت بین الاصوبائی رابطہ کی جانب سے بھیجی گئی سمری میں 2 نام موصول ہوئے تھے جس میں نجم سیٹھی اور شکیل شیخ کا نام شامل ہے۔
وزیراعظم کی جانب سے دونوں ارکان کی گورننگ بورڈ میں نامزدگی کی منظوری دے دی گئی ہے۔ پی سی بی بورڈ آف گورنرز نئے چیئرمین پی سی بی کا انتخاب کریں گے۔
میڈیا رپورٹس کے مطابق 4 نوٹیفکیشن جاری کیے جائیں گے، 2019ء کا کرکٹ بورڈ آئین ختم کر دیا جائے گا، 2019ء میں وزیر اعظم کے دو نامزد کردہ ناموں کو بھی ختم کر دیا جائے گا۔
تیسرے نوٹیفکیشن میں 2014ء کا آئین بحال کر دیا جائے گا جبکہ چوتھے نوٹیفکیشن میں موجودہ بورڈ کو چلانے کے لیے ایک سیٹ اپ کا اعلان کیا جائے گا۔
میڈیا رپورٹس میں بتایا گیا ہے کہ دورہ نیوزی لینڈ کی سلیکشن کے لیے فوری طور پر عبوری سلیکشن کمیٹی بنائی جائے گی جو کھلاڑیوں کا اعلان بھی کرے گی۔ عبوری سلیکشن کمیٹی میں 4 بڑے نامور کرکٹرز کو شامل کیا گیا ہے۔
واضح رہے پاکستان اور نیوزی لینڈ کے درمیان ٹیسٹ سیریز کا آغاز 26 دسمبر سے شیڈول ہے۔ نیوزی لینڈ کی ٹیم بھی کل تک دورہ پاکستان پر کراچی پہنچ جائے گی۔
