-
-
مہنگائی سے پریشان کراچی کی عوام کیلئے راحت کی خبر آگئی۔ نیپرا نے کے الیکٹرک صارفین کیلئے بجلی سستی کرنے کا اعلان کردیا۔ کراچی کیلئے بجلی 4 روپے 87 پیسے فی یونٹ سستی کی گئی ہے۔
چیئرمین نیپرا توصیف ایچ فاروقی کی زیرِ صدارت کے الیکٹرک کی اگست کے فیول چارجز کی ایڈجسٹمنٹ کی سماعت ہوئی۔
دورانِ سماعت چیئرمین نیپرا نے بتایا کہ کراچی کے صارفین کے لیے بجلی 4 روپے 87 پیسے سستی ہو گی، جس سے انہیں 8 ارب 87 کروڑ روپے کا ریلیف ملے گا۔
سماعت کے دوران کیس افسر نیپرا نے بتایا کہ کے الیکٹرک نے اگست کی فیول ایڈجسمنٹ میں 4 روپے 21 پیسے فی یونٹ کمی کی تجویز دی۔ کے الیکٹرک کی اپنی بجلی پیداوار کی لاگت 38 روپے فی یونٹ ہے اور جو بجلی خریدتا ہے اس کی لاگت 13.61 روپے فی یونٹ ہے۔
اس موقع پر چیئرمین نیپرا نے سوال کیا کہ کے الیکٹرک بجلی کی پیداواری لاگت کم کرنے کیلئے کیا کر رہی ہے ؟ کے الیکٹرک نیشنل گرڈ کے مقابلے میں 24 روپے فی یونٹ مہنگی بجلی بنا رہا ہے۔
ممبر نیپرا کے پی نے کہا کہ کے الیکٹرک اپنی بجلی بنانے کی قیمت کم کرتا تو صارف کو 6 روپے فی یونٹ ریلیف ملتا۔ چیئرمین نیپرا نے ہدایت کی کہ کے الیکٹرک سستی بجلی کی پیداوار کے لیے اقدامات کرے۔
چیئرمین نیپرا نے کہا کہ ہم کراچی کے صارفین کے مسائل سننے کے لیے کھلی کچہری لگائیں گے۔ کے الیکٹرک حکام نے بتایا کہ پورٹ قاسم پاور پلانٹ کے یونٹ ون میں خرابی آئی ہوئی ہے، جس دور کرنے کے لیے ٹیمیں کام کر رہی ہیں۔
