-
-
نیشنل ٹی ٹوئنٹی کپ کا آج سے کراچی میں آغاز ہورہا ہے۔ ٹورنامنٹ میں اٹھارہ ٹیمیں شریک ہیں جن کے میچز چار مختلف گراؤنڈز میں کھیلے جائیں گے۔ نیشنل اسٹیڈیم میں شائقین مفت میں میچز سے محظوظ ہوسکیں گے۔
قومی ٹی ٹوئنٹی کپ کے میچز نیشنل اسٹیڈیم، یوبی ایل اسپورٹس کمپلیکس، ہائی پرفارمنس سینٹر اوول گراؤنڈ اور نیشنل بینک اسپورٹس کمپلیکس پر کھیلے جائیں گے۔
نیشنل اسٹیڈیم میں کھیلے جانے والے تمام میچز پی ٹی وی اسپورٹس اور اے آر وائی زیپ پر براڈکاسٹ ہونگے جبکہ غیرممالک کے لئے یوٹیوب پر لائیو اسٹریمنگ ہوگی۔ نیشنل اسٹیڈیم میں ایک دن میں دو میچز سہ پہر تین بجے اور رات آٹھ بجے شروع ہونگے جن کے ٹاس ڈھائی بجے اور ساڑھے سات بجے ہوا کریں گے۔
پاکستان کرکٹ بورڈ نے نیشنل اسٹیڈیم میں کھیلے جانے والے میچوں میں شائقین کا داخلہ مفت کردیا ہے جو حنیف محمد، جاوید میانداد اور فضل محمود انکلوژر میں بیٹھ کر میچ دیکھ سکیں گے۔ ٹورنامنٹ میں مجموعی طور پر 63 میچز کھیلے جائیں گے۔
پہلے مرحلے میں 32 گروپ میچز ہونگے جو 24 سے 28 نومبرتک کھیلے جائیں گے جس کے بعد سپر8 کا مرحلہ ہوگا۔ اٹھارہ ٹیموں کو چار گروپس میں رکھا گیا ہے۔ گروپ اے میں لاہور وائٹس، پشاور، کراچی بلوز، لاڑکانہ اور کوئٹہ کو شامل کیا گیا ہے جبکہ گروپ بی میں لاہور بلوز، کراچی وائٹس، اسلام آباد، حیدرآباد اور ڈیرہ مراد جمالی شامل ہیں۔
اسی طرح گروپ سی میں راولپنڈی، ایبٹ آباد، فیصل آباد اور بہاولپور کی ٹیموں کو شامل کیا گیا ہے۔ گروپ ڈی میں ملتان، سیالکوٹ، فاٹا اور آزادجموں کشمیر کی ٹیمیں ہیں۔
پہلے روز لاہور وائٹس کا مقابلہ لاڑکانہ سے اور کراچی بلوز کا مقابلہ پشاور سے این بی پی اسپورٹس کمپلیکس میں ہوگا۔گروپ بی میں کراچی وائٹس کا مقابلہ اسلام آباد سے اور حیدرآباد کا مقابلہ ڈیرہ مراد جمالی سے یوبی ایل اسپورٹس کمپلیکس میں ہوگا۔
گروپ سی میں راولپنڈی کامقابلہ ایبٹ آباد سے اور فیصل آباد کا مقابلہ بہاولپور سے نیشنل اسٹیڈیم میں ہوگا۔گروپ ڈی میں ایچ پی سی اوول میں ملتان بمقابلہ سیالکوٹ اور فاٹا بمقابلہ آزاد جموں کشمیر ہوگا۔
ہر گروپ سے دو ٹاپ ٹیمیں سپر ایٹ مرحلے میں جگہ بنائیں گی جو یکم سے آٹھ دسمبر تک راؤنڈ رابن لیگ کی بنیاد پر کھیلا جائے گا۔ دونوں سیمی فائنلز 9 دسمبر کو نیشنل اسٹیڈیم میں سہ پہر تین بجے اور رات آٹھ بجے کھیلے جائیں گے۔
فائنل 10 دسمبر کو نیشنل اسٹیڈیم میں رات آٹھ بجے کھیلا جائے گا۔ فاتح ٹیم کو پچاس لاکھ روپے، رنرز اپ ٹیم کو پچیس لاکھ روپے کی انعامی رقم ملے گی جبکہ پلیئر آف دی ٹورنامنٹ کو ڈھائی لاکھ روپے ملیں گے۔ اتنی ہی رقم تین مختلف ایوارڈز، ٹورنامنٹ کے بہترین بیٹر، بہترین بولر اور بہترین وکٹ کیپر کے لیے رکھی گئی ہے۔
سپر ایٹ مرحلے کے ہر مین آف دی میچ اور سیمی فائنلز کے پلیئر آف دی میچ کو پچیس ہزار روپے جبکہ فائنل کے پلیئر آف دی میچ کو پچاس ہزار روپے ملیں گے۔
