-
-
کراچی میں فٹبال کا بے حد جنون پایا جاتا ہے لیکن ناکافی سہولیات کے باعث مقامی سطح پر کھیلنے والے نوجوان فٹبالرز قومی سطح تک پہنچنے میں ناکام رہتے ہیں۔ کراچی میں نوجوان فٹبالرز کی تلاش کیلئے انٹرنیشنل فٹبال کوچ ایلکس پائیک کراچی پہنچ گئے ہیں۔
کمشنر کراچی محمداقبال میمن کی کوششوں سے انڈر 15 لیول پر فٹبالرز کو آگے بڑھنے کے مواقع دینے کیلئے ایلکس پائیک کو کراچی مدعو کیا گیا ہے۔ ایلکس پائیک سوئیڈن ٹاؤن فٹبال کلب کے کوچ ہیں۔ جو کراچی میں انڈر 15 فٹبالرز کے ٹرائلز لیں گے۔
کمشنر کراچی نے اعلان کیا ہے کہ انڈر 15 فٹبالرز کے ٹرائلز 21 تا 25 مارچ کے ایم سی فٹبال اسٹیڈیم میں منقعد کئے جا رہے ہیں ۔ جس میں الیکس پائیک 300 بچوں کے فٹبال ٹرائلز کی نگرانی کریں گے۔
ٹرائلز میں باصلاحیت بچوں کی ٹیم بنائی جائے گی جن میں سے بہترین بچوں کو فٹبال کی ٹریننگ کےلئے انگلینڈ روانہ کیا جائے گا اور بچوں کی تربیت کے تمام اخراجات سوئیڈن ٹاؤن فٹبال کلب برداشت کرے گا۔
کمشنر کراچی کے مطابق ایک ماہ قبل برطانیہ کے سوئنڈن ٹاؤن فٹبال کلب سے معاہدہ کیا تھا ، محمداقبال میمن نے سوئنڈن فٹبال کلب کا شکریہ ادا کرتے ہوئے کہا کہ معاہدے پر بڑی تیزی سے عملدرآمد ہو رہا ہے۔ کراچی کے باصلاحیت بچے اس موقع سے بھرپور فائدہ اٹھائیں اور آگے بڑھ کر فٹبال میں اپنے شہر اور ملک کا نام روشن کریں ۔
