ملک بھر میں یکساں رزلٹ کارڈ متعارف کروانے کا فیصلہ، کم از کم پاسنگ مارکس 40 کرنے پر بھی اتفاق

پاکستان کے تمام تعلیمی بورڈز نے ملک بھر میں کم از کم پاسنگ مارکس 40 کرنے پر اتفاق کیا ہے جبکہ ملک بھر میں یکساں رزلٹ کارڈ بھی متعارف کروانے کا فیصلہ کیا گیا ہے۔

جیو نیوز کی رپورٹ کے مطابق ملک کے تعلیمی بورڈ ز کی کمیٹی فارچیئرمینز کا دو روزہ اجلاس ہواجس میں 21 نکاتی ایجنڈے پر غور اور اہم امور پر اتفاق کیا گیا۔

اجلاس میں  کمیٹی نے پاسنگ مارکس کم ازکم 40 فیصد کرنے پر اتفاق کیا ہے جب کہ میٹرک اور انٹرمیڈیٹ کے مسلمان طلبہ کے لیے مطالعہ قرآن لازمی قرار دینے پر بھی اتفاق کیا گیا ہے۔

بورڈز کے چیئرمینز نے اس بات پر بھی اتفاق کیا ہے کہ پورے ملک میں یکساں رزلٹ کارڈ متعارف کیا جائے گا اور امتحانی شیڈول مارچ اپریل کے بجائے مئی جون میں کرنے پر اتفاق کیا گیا ہے۔

اس کے علاوہ اجلاس میں رواں سال کے لیے انٹربورڈ اسپورٹس کمیٹی کے چیئرمین کی تعیناتی کا فیصلہ کیا گیا ہے اور بلوچستان بورڈ رواں سال انٹربورڈ اسپورٹس کمیٹی کا چیئرمین ہوگا۔

Hurmat Majid