-
-
پاکستان کرکٹ ٹیم کے مڈل آرڈر بیٹر افتخار احمد نے قومی ٹیم کے سابق کپتان مصباح الحق کو اپنا آئیڈیل قرار دیا ہے۔ افتخاراحمد کا کہنا ہے کہ وہ مصباح الحق کی طرح کھیلنے کی کوشش کرتے ہیں۔
پرتھ میں میڈیا سے گفتگو کرتے ہوئے افتخاراحمد کا کہنا تھا کہ وہ جب بھی بیٹنگ کیلئے آتے ہیں کپتان اور مینجمنٹ کے دئے پلان پر عمل کرنے کی پوری کوشش کرتے ہیں۔
افتخار احمد نے کہا کہ ٹاپ آرڈر کی جلد وکٹیں گرنے کے باوجود بھی دباؤ نہیں لیتا اور مینجمنٹ کے دئے گئے رول کے مطابق بیٹنگ کرتا ہوں۔
افتخاراحمد کا کہنا تھا کہ بھارت کے خلاف میچ ہارنے کے بعد مایوسی ہوئی تھی لیکن کپتان اور مینجمنٹ نے تمام کھلاڑیوں کا حوصلہ بڑھایا ۔ تمام پلیئرز شکست کو بھلا کر زمبابوے کے خلاف جیت کے عزم کے ساتھ میدان میں اتریں گے۔
واضح رہے ٹی ٹوئنٹی ورلڈکپ میں پاکستانی ٹیم اپنا اگلا میچ کل بروز جمعرات زمبابوے کے خلاف کھیلے گی۔ میچ پرتھ کے کرکٹ اسٹیڈیم میں شیڈول ہے جو پاکستانی وقت کے مطابق شام چار بجے کھیلا جائے گا۔
