-
-
سعودی عرب کے تاریخی شہر مکہ مکرمہ میں واقع مسلمانوں کے مقدس ترین مقام مسجد الحرام میں خانہء کعبہ کے غلاف کی تبدیلی کا عمل مکمل کر لیا گیا ہے۔ نئے اسلامی سال کے آغاز پر مسجد الحرام میں غلاف کعبہ کی تبدیلی کی روح پرور تقریب نماز عشاء کے بعد منعقد ہوئی۔
خانہ کعبہ کی دیواروں اور باب کعبہ (دروازہِ کعبہ) کو جس کپڑے سے ڈھانپا جاتا ہے اسے غلاف کعبہ یا کسوہ (عربی: كسوة الكعبة) کہتے ہیں، غلافِ کعبہ کی تبدیلی کی روایت صدیوں سے چلی آ رہی ہے جس کے لیے ہر سال ایک پُروقار تقریب منعقد ہوتی ہے۔
نقل كسوة الكعبة المشرفة استعدادًا لإدخالها إلى صحن المطاف. #المسجد_الحرام #الكعبة_المشرفة pic.twitter.com/BWiBL1Sh5i
— Haramain Archive (@haramainarchive) July 29, 2022
اِس بار روایت سے ہٹ کر غلافِ کعبہ کی تبدیلی کی تقریب ہفتے کو نئے اسلامی سال 1444ھ کے پہلے دن یعنی یکم محرم الحرام کو منعقد ہوئی۔ اس سے قبل کئی عشروں سے غلافِ کعبہ (کِسوہ) کو 9 ذوالحجہ کی صبح کو تبدیل کیا جاتا رہا تھا۔
سعودی عرب میں نماز عشاء کے بعد غلاف کعبہ کی تبدیلی کا عمل شروع کیا گیا۔ سیاہ ریشم سے تیار کسوہ، شاہ عبدالعزیز کمپلیکس فار ہولی کعبہ کسوہ مکہ میں تیار کیا گیا۔ ہر سال غلاف کعبہ کی تبدیلی کی تقریب نماز عشا کے بعد قریب پانچ گھنٹے تک جاری رہتی ہے اور اسے پوری دنیا میں لوگ براہ راست دیکھ سکتے ہیں۔
VIDEO: New Kiswah being donned on the Ka’bah #KiswahCeremony1444 pic.twitter.com/oUxcIYl8qf
— Haramain Sharifain (@hsharifain) July 29, 2022
غلافِ کعبہ جسے کِسوہ کہا جاتا ہے، مجموعی طور پر 16 ٹکڑوں پر مشتمل ہوتا ہے۔ کسوہ کی لمبائی 50 فٹ اور چوڑائی 35 سے 40 فٹ ہے۔ رواں سال غلافِ کعبہ کی تبدیلی کی تاریخ 9 ذوالحجہ سے بدل کر یکم محرم کرنے کا اعلان کیا گیا تھا۔
حرمین الشریفین کے اُمور کی نگراں وزارت کے مطابق غلافِ کعبہ کی تبدیلی کی پُروقار تقریب میں امامِ کعبہ اور حرمین الشریفین اُمور کے سربراہ شیخ عبدالرحمٰن السدیس نے بھی شرکت کی۔
— Haramain Sharifain (@hsharifain) July 29, 2022
مسجد الحرام میں موجود سینکڑوں عازمین نے غلافِ کعبہ کی تبدیلی کا رُوح پرور منظر دیکھا اور دعائیں کیں۔ غلافِ کعبہ کی تبدیلی کے پُرنور عمل میں کلید بردار کعبہ، منتظمینِ کعبہ، سعودی حکام اور کسوہ تیار کرنے والی فیکٹری کے منتظمین سمیت دو سو سے زائد ماہرین اور تربیت یافتہ کارکنوں نے حصہ لیا۔
