-
-
اسلام آباد کی ڈسٹرکٹ اینڈ سیشن عدالت میں پی ٹی آئی لانگ مارچ کے دوران توڑ پھوڑ سے متعلق 10 مقدمات میں عمران خان کی درخواست ضمانت کی سماعت ہوئی۔
دوران سماعت چیئرمین پی ٹی آئی عمران خان ذاتی حیثیت میں پیش ہوئے۔ پی ٹی آئی رہنما اسد عمر، علی نواز اعوان، ڈاکٹر بابر اعوان بھی عدالت میں پیش ہوئے۔
عمران خان نے عدالت سے دس مقدمات میں ضمانت قبل از گرفتاری کی استدعا کی۔ سیشن جج کامران بشارت مفتی نے عمران خان کی 6 جولائی تک عبوری ضمانت منظور کرلی۔
عدالت نے عمران خان کو تمام مقدمات میں پانچ پانچ ہزار روپے کے مچلکے جمع کرانے کا حکم دیتے ہوئے پولیس کو ریکارڈ سمیت آئندہ سماعت پر طلب کر لیا۔
واضح رہے 26 مئی کو عمران خان کی جانب سے اسلام آباد کی جانب لانگ مارچ کے دوران لاہور اور اسلام آباد میں ڈی چوک کے مقام پر شدید ہنگامہ آرائی ہوئی۔ پولیس کے ساتھ تصادم کے نتیجے میں املاک کو بھی نقصان پہنچایا گیا۔
ڈی چوک پر درختوں کو آگ لگائی جبکہ پولیس پر پتھراؤ بھی کیا گیا۔ ہنگامہ آرائی اور توڑ پھوڑ کے نتیجے میں چیئرمین پی ٹی آئی عمران خان سمیت تحریک انصاف کے دیگر رہنماؤں کو مقدمات میں نامزد کیا گیا تھا۔
