-
-
سندھ ہائی کورٹ میں کراچی کے علاقے گولی مار پیتل گلی میں غیر قانونی تعمیرات کے خلاف دائر کی گئی درخواست پر سماعت ہوئی۔ غیرقانونی تعمیرات کی روک تھام میں ناکامی پر عدالت نے سندھ بلڈنگ اینڈ کنٹرول اتھارٹی اور دیگر اداروں پر برہمی کا اظہار کیا۔
درخواست گزار شجاعت علی کی دائر کی گئی درخواست کے مطابق پیتل گلی پلاٹ نمبر 11/1 سو کوارٹرز میں غیر قانونی طور پر پورشنز بنانے جارہے ہیں،متعلقہ اداروں کو غیر قانونی تعمیرات کے خلاف درخواستیں دیں مگر کارروائی نہیں کی گئی۔
سندھ ہائی کورٹ نے غیر قانونی تعمیرات سے متعلق بڑا حکم نامہ جاری کرتے ہوئے فوری طور پر غیر قانونی تعمیرات روکنے کا حکم دے دیا۔ عدالت نے ایس بی سی اے کو غیر قانونی تعمیر ہونے والی عمارت کے خلاف کارروائی کا بھی حکم دے دیا۔ سب رجسٹرار کو عمارت کی سب لیز دینے سےبھی روک دیا۔
عدالت نے کے الیکٹرک، سوئی سدرن گیس کمپنی اور دیگر محکموں کو گیس بجلی اور پانی کے کنکشنز منقطع کرنے کا حکم بھی دے دیا۔عدالت نے سندھ بلڈنگ اینڈ کنٹرول اتھارٹی اور دیگر محکموں سے 6 ہفتوں میں رپورٹ طلب کرلی۔
