-
-
پاکستان انٹرنیشنل ایئرلائنز (پی آئی اے) نے متعدد پروازیں منسوخ ہونے سے متعلق وضاحتی بیان جاری کردیا۔ پی آئی اے انتظامیہ کا کہنا ہے کہ صرف وہ پروازیں چلائی جارہی ہیں جنکے لئے ایندھن کی فراہمی یقینی ہوتی ہے۔
پی آئی اے انتظامیہ کی جانب سے جاری بیان میں کہا گیا ہے کہ پی آئی اے نے گزشتہ دو ہفتوں سے اپنا معمول کا آپریشن معطل کر رکھا ہے تاہم یومیہ بنیاد پر پروازیں شیڈول کی جارہی ہیں۔ ایندھن کی مقدار میں دستیابی کو مد نظر رکھ کر پروازیں چلائی جارہی ہے۔
پی آئی اے انتظامیہ کے مطابق ادارہ صرف وہ پروازیں آپریٹ کر رہا ہے جن کے لئے ایندھن کی فراہمی یقینی ہوتی ہے اور وہ تمام پروازیں اپنے شیڈول کے مطابق روانہ ہو رہی ہیں۔
پاکستان انٹرنیشنل لائنز انتظامیہ کا کہنا ہے کہ یہ تاثر غلط ہے کہ بڑی تعداد میں پروازیں منسوخ ہورہی ہیں۔ پی آئی اے، پی ایس او کو پروازوں کو ایندھن فراہم کرنے کے لیے پیشگی ادائیگی کرتا ہے۔
پی آئی اے انتظامیہ اپنے ذرائع سے کچھ فنڈز کے حصول کے لیے کوشاں ہیں۔ فنڈز دستیاب ہوتے ہی پی آئی اے معمول کی پروازیں چلانا شروع کر دے گی۔ پی آئی اے نے اپنا بین آلاقوامی اپریشن بحال رکھنے کے لیے منصوبہ بندی کر رکھی ہے۔
بین الاقوامی آپریشن میں کینیڈا، ترکی، چین، ملائیشیا اور سعودی عرب کے آپریشن کو ترجیح دی جا رہی ہے۔ اندرون ملک آپریشن متاثر ضرور ہے مگر اس کی بتدریج بحالی کی منصوبہ بندی پر کام جاری ہے۔
ترجمان پی آئی اے کے مطابق مسافروں کوان کی مطلوبہ پروازوں کے متعلق پی آئی اے کال سینٹر کے ذریعے آگاہی فراہم کی جا رہی ہے۔ آپریشن متاثر ہونے سے مسافروں کو درپیش مشکلات اور زحمت کے لیے پی آئی اے انتظامیہ معذرت خواہ ہے۔
