-
-
صدر مملکت ڈاکٹر عارف علوی نے شہری عفت ناہید کی جمع کرائی گئی درخواست پر جوبلی لائف انشورنس کمپنی کو پالیسی ہولڈر کی بیوہ کو 12 لاکھ روپے ادا کرنے کا حکم دیدیا۔ صدر مملکت نے بیوہ کے حق میں فیصلہ سناتے ہوئے کہاکہ انشورنس کمپنی 30 دن کے اندر شکایت کنندہ کو 12 لاکھ روپے کی رقم ادا کرے ۔
ڈاکٹر عارف علوی نے کہاکہ کمپنی نے پالیسی کی یونٹ قیمت کے طور پر 12 لاکھ روپے کی ادائیگی کو نظر انداز کیا، کمپنی نے بیوہ کو صرف 45 لاکھ روپے واپس کیے جو مرحوم شوہر نے بطور پریمیم کمپنی کو اداکیے تھے ۔
عفت ناہید نامی شہری نے وفاقی انشورنس محتسب کے حکم کے خلاف صدر مملکت کو درخواست کر رکھی تھی۔ وفاقی انشورنس محتسب نے مبینہ طور پر باہمی تصفیہ کی بنیاد پر 45 لاکھ کی ادائیگی کے بعد کیس بند کرنے کا حکم دیا تھا۔
صدر مملکت نے کہاکہ کمپنی نے پالیسی ہولڈر کی رقم کاروبار میں لگانے کے بعد منافع کمایا ، شکایت کنندہ کو منافع سے محروم کرنا ناانصافی ہوگی۔
محمد شفیق نے 2016 میں جوبلی لائف انشورنس سے پالیسی حاصل کی ، 45 لاکھ روپے ادا کیے ، انتقال کے بعد بیوہ نے دعویٰ دائر کیا ، کمپنی نے انہیں اداکردہ صرف 45 لاکھ روپے واپس کیے ۔صدر مملکت نے کہاکہ وفاقی انشورنس محتسب نے تصفیہ کی آڑ میں واپس کی گئی 45 لاکھ کی رقم کی اصل نوعیت کو نظر انداز کیا۔
بیوہ کو صرف شوہر کی ادا کردہ رقم واپس کرنا انصاف کے اصولوں کے منافی اور ناجائز ہے ۔ صدر مملکت نے کہاکہ پاکستان کے آئین کے آرٹیکل 3 کے تحت ریاست ہر قسم کے استحصال کے خاتمے کو یقینی بنائے گی۔ انشورنس آرڈیننس انشورنس پالیسی ہولڈرز کے مفادات کے تحفظ کیلئے جاری کیا گیا ۔
