-
-
وفاقی وزیرداخلہ شیخ رشید احمد نے اسٹیبلشمنٹ سے مداخلت کرنے اور وزیراعظم پاکستان عمران خان کے خلاف عدم اعتماد کی تحریک پیش کرنے والی جماعتوں کو کالعدم قرار دینے کا مطالبہ کردیا۔
اسلام آباد میں میڈیا سے گفتگو میں شیخ رشید احمد نے کہا کہ عدم اعتماد کی تحریک بیرونی سازش ہے۔ جن لوگوں نے اس سازش میں حصہ ڈالا انکے خلاف غداری کے مقدمے درج ہونے چاہیں اور عالمی سازش کا حصہ بننے والی جماعتوں کو کالعدم قرار دینا چاہئے۔
وزیر داخلہ نے کہا کہ 4 راستے ہیں، نمبر ون ملک میں قبل از وقت انتخابات کروا دیے جائیں، دوسرا راستہ یہ ہے کہ تحریک عدم اعتماد پیش کرنے والی سیاسی جماعتوں کو کالعدم قرار دیا جائے جو غیر ملکی پیسے لے کر سازش کرتی ہیں، تیسرا آپشن یہ ہے کہ پی ٹی آئی کے سارے ارکان اسمبلی مستعفی ہوجائیں دیکھتا ہوں یہ لوگ ملک کس طرح چلاتے ہیں۔
وفاقی وزیرداخلہ شیخ رشید احمد نے کہا کہ آخری راستہ یہ ہے کہ ادارے اور اسٹیبلشمنٹ مداخلت کریں، ملکی سلامتی کا سوال پیدا ہوگیا ہے، لڑائی اب گلی محلوں تک پہنچ گئی ہے، ملک اس کا متحمل نہیں ہوسکتا، کیا یہ انصاف ہے کہ مقصود چپڑاسی اور دہی بھلے والا اس ملک کو چلائیں گے، ان پر 16 ، 16 ارب روپے کے کیس ہیں، یہ عوام کو بٹیر سمجھتے ہیں، انہوں نے ملک کو لوٹا نوچا کھسوٹا ہے، یہ سارے اشتہاری اپنے کیسز ختم کرا رہے ہیں۔
شیخ رشید نے مزید کہا کہ جی ایچ کیو، ٹرپل ون بریگیڈ، ایئرفورس ہیڈکوارٹرز میرا حلقہ ہے، مجھ ان سے دکھ ہے کہ یہ الیکشن میں ووٹ ڈالنے نہیں آتے، اگر یہ 5، 6 ادارے میرے حلقے میں ووٹ ڈالنے آجائیں تو مجھے کسی سے ووٹ ہی نہ مانگنے پڑیں، ہر گھنٹے صورتحال بدل رہی ہے، اب بھی ناامید نہیں ہوں کچھ بھی ہوسکتاہے۔
