-
-
جماعت اسلامی کراچی کے امیر حافظ نعیم الرحمان نے ایک بار پھر سندھ حکومت کو شدید تنقید کا نشانہ بنایا ہے۔ حافظ نعیم کا کہنا ہے کہ سندھ حکومت کراچی اور عوام کے ساتھ کھلواڑ کررہی ہے۔
کراچی میں میڈیا سے گفتگو کرتے ہوئے امیر جماعت اسلامی نے کہا کہ کراچی میں بارشیں ہورہی ہیں، اب تک نالوں کی صفائی نہیں ہوئی، مرتضیٰ وہاب بتائیں 120کروڑ روپے کی صفائی کہاں ہوئی؟
انہوں نے کہا کہ الیکشن کمیشن کے کون سے رولز پر عملدر آمد ہورہا ہے؟ کراچی کیلئے اعلان کیا جاتاہے لیکن بجٹ میں پیسے نہیں رکھتے، سندھ حکومت سہولتیں فراہم کرنے میں ناکام ہے۔
نعیم الرحمان نے کہا کہ غیرسیاسی ایڈمنسٹریٹر کا تقرر کرکے مرتضیٰ وہاب کو برطرف کیا جائے، ہر وزیراعظم کراچی میں آکر بےوقوف بناتا ہے۔
جماعت اسلامی کراچی کے سربراہ کا کہنا ہے کہ تمام تر اختیارات پر سندھ حکومت کا قبضہ ہے، سندھ حکومت کراچی اور عوام کےساتھ کھلواڑ کررہی ہے۔
حافظ نعیم الرحمان نے مزید کہا کہ معمولی بارش کے بعد تاحال پانی کی نکاسی نہیں کی گئی، کراچی میں گندگی بڑھ رہی ہے کوئی پرسان حال نہیں۔
واضح رہے کہ شہر قائد میں آج بھی ابر رحمت برسنے کا امکان بتایا جارہا ہے۔ محکمہ موسمیات کا کہنا ہے کہ شہر میں آج بھی درمیانے درجے کی بارش کا امکان ہے جبکہ بارشوں کا یہ سلسلہ مزید چند روز تک جاری رہیگا۔
