روپے کی بے قدری جاری، ڈالر تاریخ کی بلندترین 191 روپے کی سطح سے تجاوز کرگیا

پاکستان میں سیاسی عدم استحکام نے ملکی معیشیت کو داؤ پر لگادیا۔ موجودہ سیاسی صورتحال کے باعث ڈالر بے قابو ہوگیا۔ ایک ڈالر کی قیمت تاریخ کی بلندترین سطح پر پہنچ گئی۔

کاروباری ہفتے کے تیسرے دن بھی مبادلہ مارکیٹوں میں روپے کی بے قدری اور ڈالر کی اونچی اڑان جاری ہے۔ انٹربینک میں کاروبار کے آغاز پر ہی ڈالر کی قیمت میں 1 روپے اور 34 پیسے کا مذید اضافہ ہوگیا۔

اضافے کے بعد ڈالر پاکستان میں تاریخ کی بلند ترین سطح پر پہنچ گیا اور اسکی قیمت 190 روپے تک پہنچ گئی۔ اوپن مارکیٹ میں ڈالر 191 روپے 50 پیسے پر ٹریڈ ہورہا ہے۔ ڈالر کی قدر بڑھنے سے قرضوں کے بوجھ میں 930 ارب سے زائد کا اضافہ ہوچکا ہے۔ 

واضح رہے کہ 10 اپریل کو عمران خان کو وزیراعظم کے عہدے سے ہٹائے جانے کے بعد روپے کی قدر میں بہتری آئی تھی اور 188 تک پہنچنے والے ڈالر کی قیمت گرتے گرتے 181 روپے تک آگئی تھی۔

سولہ اپریل کو ڈالر کی قیمت 181 روپے 55 پیسے تھی لیکن اسکے بعد سے ڈالر کی قیمت میں دوبارہ اضافہ ہونا شروع ہوا اور اب تک ڈالر کی 8 روپے سے زائد مہنگا ہوچکا ہے۔

ڈالر کی قیمت میں مسلسل اضافے سے پاکستان کے گردشی قرضوں میں بھی اضافہ ہورہا ہے جبکہ دوسری جانب اسٹاک ایکسچینج میں بھی مسلسل مندی دیکھی جارہی ہے جسکے باعث کاروباری طبقہ انتہائی مشکلات کا شکار ہے۔

admin