-
-
فریضہ حج کی ادائیگی کے بعد سرکاری اسکیم کے تحت جانے والے حجاج کرام کی وطن واپسی آج رات سے شروع ہو رہی ہے۔ حاجیوں کو اب ائیرپورٹ پر بورڈنگ پاس کیلئے قطار نہیں لگانی پڑے گی۔
وفاقی وزیر ہوابازی و ریلوے خواجہ سعد رفیق کی ہدایت پر سرکاری اسکیم کے حجاج کرام کی وطن واپسی کیلئے پی آئی اے نے سٹی چیک ان نظام کے تحت بورڈنگ پاس ایئرپورٹ پہنچنے سے پہلے ہی جاری کرنے کا اعلان کیا ہے۔
حجاج کرام کو واپسی کے سفر کیلئے 12 گھنٹے قبل ائرپورٹ پہنچنے اور قطاروں میں لگنے کی ضرورت نہیں ہوگی۔ پی آئی اے سرکاری اسکیم والے حجاج کرام کو شہر میں ہی بورڈنگ جاری کردے گا جس کے بعد ائیرپورٹ پر صرف امیگریشن ہوگی۔
سٹی چیک ان کا مقصد حجاج کرام کو سہولتیں پہنچانا اور ایئرپورٹ پر ممکنہ رش اور لمبی قطاروں کی کوفت سے بچانا ہے۔ پراجیکٹ کا آغاز وزیر ہوابازی خواجہ سعد رفیق کی ذاتی کاوشوں اور حجاج کو ہر ممکن آسانی فراہم کرنے کا حصہ ہے۔
سرکاری اسکیم کے تحت جانے والے حجاج کرام کی وطن واپسی آج رات سے شروع ہو رہی ہے۔ پی آئی اے کی پہلی حج پرواز پی کے 732 آج رات ایک بجکر 5 منٹ پر حجاز مقدس سے 324 حجاج کو لے کر کراچی پہنچے گی۔
پی آئی اے کی دوسری پرواز پی کی 739 جدہ سے لاہور 14 جولائی کی صبح 2 بجے پہنچے گی۔ 14 جولائی بروز جمعرات پی ائی اے کی 5 پروازیں جدہ سے کراچی، لاہور، ملتان، اسلام آباد اور پشاور آئیں گی۔
پی آئی اے کا بعد از حج آپریشن 154 پروازوں پر مشتمل ہوگا جس کے ذریعے 28 ہزار 80 حجاج وطن واپس آئیں گے۔ پی آئی اے کا حج آپریشن 14 جولائی سے 13 اگست تک جاری رہے گا۔
