-
-
کے الیکٹرک نے جولائی کی فیول ایڈجسٹمنٹ کی مد میں نیپرا کو بجلی سستی کرنے کی درخواست کردی۔ کے الیکٹرک نے بجلی 3 روپے 47 پیسے فی یونٹ سستی کرنے کی درخواست کی ہے۔
کراچی کو بجلی فراہم کرنے والے ادارے کے الیکٹرک کی نیشنل الیکٹرک پاور ریگولیٹری اتھارٹی (نیپرا) کو جمع کرائی گئی درخواست پر سماعت آج کی جائے گی۔
ترجمان کے الیکٹرک کے مطابق عالمی سطح پر ایندھن کی قیمتوں میں کمی کا فائدہ صارفین کو بلوں میں منتقل کیا جائیگا۔ نیپرا سے جولائی کی فیول ایڈجسمٹنٹ کی مد میں بجلی 3 روپے 47 پیسے سستی کرنے کی درخواست کی ہے۔
ترجمان کے الیکٹرک کا کہنا ہے کہ جون کے مقابلے میں وفاق سے خریدی گئی بجلی کی قیمت میں 31 فیصد، آر ایل این جی قیمت میں 16 فیصد کمی پیش آئی, تاہم فرنس آئل میں 4 فیصد اضافہ پیش آیا ہے۔
کے الیکٹرک نے نیپرا سے اپریل تا جون کی سہہ ماہی کی مد میں 14 روپے 53 پیسے کے اضافے کی درخواست جمع کرائی ہے تاہم ترجمان کا کہنا ہے کہ یکساں ٹیریف پالیسی کے تحت سہ ماہی ایڈجسٹمنٹ کے اضافے کا اثر صارفین پر عمومی طور پر نہیں پڑتا۔
ترجمان کے الیکٹرک کا کہنا ہے کہ اس سلسلے میں نیپرا کی منظوری کے بعد حتمی فیصلہ وزارت توانائی کرتی ہے۔
