-
-
کراچی کے مسائل، بدامنی، اسٹریٹ کرائم اور عوام کو درپیش مشکلات پر حکومتی خاموشی کے خلاف جماعت اسلامی نے بیس مارچ کو کراچی کارواں نکالنے کا اعلان کیا ہے۔
امیر جماعت اسلامی کراچی حافظ نعیم الرحمان نے پریس کانفرنس کرتے ہوئے کہا ہے کہ کراچی میں اسٹریٹ کرائم حد سے بڑھ چکا ہے، صرف اس ماہ میں چار ہزار واقعات درج ہوچکے ہیں۔
انہوں نے کہا کہ چھ مارچ سے احتجاجی مظاہرے کریں گے، حکومت کی رٹ ناکام ہوچکی ہے، پولیس کا ادارہ کرپشن کا ادارہ بن چکا ہے، پچاس کے قریب تھانوں کے باہر احتجاج کریں گے۔
حافظ نعیم الرحمان نے کہا ہے کہ کے الیکٹرک نے فیول ایڈجسٹمنٹ کے نام پر چارجز بڑھا دیے ہیں، کے الیکٹرک اور نیپرا کی من مانی کو روکنا ہوگا، کے فور منصوبے کو کم کرکے تیرہ کروڑ گیلن کردیا ہے، یہ ایک جعلسازی ہے۔
امیر جماعت اسلامی کراچی نے کہا کہ پیپلز پارٹی کراچی والوں کیساتھ ناروا سلوک کررہی ہے، وفاق بھی کراچی کے مسائل کو حل کرنے میں سنجیدہ نہیں ہے، کراچی سرکلر ریلوے بھی اعلانات کی نظر ہوگیا ہے۔
انہوں نے کہا کہ کراچی کے لوگوں کو بیوقوف بنایا جارہا ہے، بلدیاتی قوانین پر سندھ حکومت سے مطالبات منوائے ہیں، سندھ حکومت سے بلدیاتی معاملے پر مشاورت جاری ہے، پی ٹی آئی اور ایم کیو ایم نے کراچی کی جعلی مردم شماری کا مراسلہ جاری کیا۔
حافظ نعیم الرحمان نے کہا ہے کہ ایم کیو ایم کوٹہ سسٹم پر خاموش ہے، پاکستان کا مسئلہ عدم اعتماد کی تحریک نہیں ہے، 20 مارچ کو کراچی کارواں نکالا جائے گا، کراچی والوں کیلئے جماعت اسلامی ایک قانونی سیل بنا رہی ہے تاکہ عوام کو قانونی معاونت ملے۔
