-
-
جمعیت علماء اسلام (ف) اور پی ڈی ایم کے سربراہ مولانا فضل الرحمان نے دوبارہ سڑکوں پر نہ آنے کا اعلان کردیا ہے۔ مولانا فضل الرحمان کے مطابق صبح ہونے سے پہلے ہی انکے تمام ممبران قومی اسمبلی اور کارکنان کو رہا کردیا گیا ہے۔ رہائی نہ ملنے کی صورت میں دوبارہ سڑکوں پر آنے کا کہا تھا اب اسکی ضرورت باقی نہیں رہی۔
سوشل میڈیا پر جاری پیغام میں مولانا فضل الرحمان نے کہا کہ پارلیمنٹ لاجز سے ممبر قومی اسمبلی اور کارکنوں کی گرفتاری کے بعد پورے ملک کو ایک گھنٹے سے بھی کم وقت میں جام کردیا تھا۔
مولانا فضل الرحمان کاے مطابق پارلیمنٹ لاجز میں اسلام آباد پولیس نے تمام قوانین اور اخلاقیات کو روندتے ہوئے دھاوا بولا، ممبران پارلیمنٹ پر بلا جواز تشدد کیا گیا اور قوم کے منتخب نمائندوں کو گھسیٹتے ہوئے گرفتار کیا گیا۔ پارلیمنٹ لاجز میں مہمانوں کو بھی زدوکوب اور گرفتار کیا گیا۔
ان کا مزید کہنا تھا کہ واقعے کی غلط تصویر اور جھوٹ پر مبنی بیانیہ قوم کے سامنے رکھا گیا، تاریخ کے صفحات پر اپنے سیاہ کردار کی پردہ پوشی کی بھونڈی کوشش کی گئی۔
مولانا فضل الرحمان نے اپنے پیغام میں جے یو آئی اور دیگر جماعتوں کے کارکنوں اور عوام کا شکریہ ادا کیا اس فتح پر مبارکباد بھی پیش کی۔ سربراہ جے یو آئی ف کا کہنا تھا کہ جمعہ کے اجتماعات میں شکرانے کے نوافل ادا کریں، آئندہ بھی اللہ سے فتح و نصرت کے لیے اجتماعی، انفرادی دعاؤں کا اہتمام کریں۔
— Maulana Fazl-ur-Rehman (@MoulanaOfficial) March 11, 2022
