-
-
نیوزی لینڈ کی حکومت نے اسکولوں میں موبائل فونز کے استعمال پر پابندی عائد کر دی ہے۔ نیوزی لینڈ کے وزیراعظم کرسٹوفر لیکسن نے یہ اعلان اس وقت کیا جب وہاں تعلیمی معیار میں کمی دیکھنے میں آرہی ہے۔
جیو نیوز کی رپورٹ کے مطابق وزیراعظم کرسٹوفر لیکسن نے کہا کہ اسکولوں میں موبائل فونز پر پابندی سے طالب علموں کا رویہ بہتر ہوگا اور انہیں پڑھائی پر توجہ مرکوز کرنے میں مدد ملے گی۔ انہوں نے کہا کہ اس پابندی کا اطلاق آئندہ 100 دنوں کے دوران ہوگا۔
انہوں نے کہا کہ ہم پورے ملک کے اسکولوں میں موبائل فونز پر پابندی عائد کر رہے ہیں، ہم چاہتے ہیں کہ بچے وہاں پڑھیں اور اساتذہ سیکھانے پر توجہ مرکوز کریں۔
پابندی کا اطلاق تمام تعلیمی اداروں میں کلاسز کے دوران ہوگا تاہم بریک ٹائم میں پابندی کا اطلاق نہیں ہوگا اور طالب علم موبائل فون استعمال کرسکیں گے۔
واضح رہے کچھ عرصے قبل تک نیوزی لینڈ کے اسکولوں کو دنیا میں بہترین تصور کیا جاتا تھا مگر پھر وہاں کے تعلیمی معیار میں تنزلی دیکھنے میں آئی ہے۔
ماہرین نے 2022 میں تعلیمی بحران سے خبردار کرتے ہوئے بتایا تھا کہ 15 سال کی عمر کے ایک تہائی سے زائد بچے بمشکل لکھنے یا پڑھنے کی صلاحیت رکھتے ہیں۔ شرح تعلیم کے ناقص معیار کی روک تھام کے لیے اقدامات کرنے کی ضرورت ہے۔
