-
-
بھارت کے معروف ایئرلائن ایئرانڈیا کی دبئی سے امرتسر جانے والی پرواز نے کراچی ایئرپورٹ پر میڈیکل ایمرجنسی لینڈنگ کی۔ طیارہ لگ بھگ 2 گھنٹے تک کراچی ایئرپورٹ پر موجود رہا۔
جیو نیوز کی رپورٹ کے مطابق ایئرانڈیا کی پرواز آئی ایکس 192 میں دوران پرواز ایک مسافر کی طبیعت خراب ہونے کے باعث طیارے کو ہنگامی لینڈنگ کروانی پڑی۔
ایئرانڈیا کا طیارہ دبئی سے امرتسر کے روٹ پر تھا کہ پاکستان کی فضائی حدود میں کوہ پتندر بلوچستان کے قریب طیارے میں سوار ایک مسافر کی طبیعت خراب ہوگئی۔
پائلٹ کے رابطہ کرنے پر ایئر ٹریفک کنٹرولر نے انسانی ہمدردی کی بنیاد پر طیارے کو کراچی ایئرپورٹ پر لینڈنگ کی اجازت دی۔ بوئنگ 737 طیارے نے ہفتے کے روز دوپہر 12 بجکر 19 منٹ پر کراچی کے جناح انٹرنیشنل ایئرپورٹ پر لینڈ کیا۔
سول ایوی ایشن کی میڈیکل ٹیم نے طیارے میں مسافر کا معائنہ کیا۔ ایوی ایشن حکام کے مطابق بھارت کے شہری مسافر کی طبیعت ٹھیک نہیں تھی۔ میڈیکل ٹیم نے مسافر کو طبی امداد دی۔
ایئرپورٹ کی بارڈر سیکورٹی کی جانب سے مسافر کو ٹریولنگ کے لیے فٹ قرار دینے پر طیارہ دو بجکر 25 منٹ پر کراچی ایئرپورٹ سے امرتسر کے لیے ٹیک آف کر گیا۔
