-
-
نیشنل گرڈ میں خرابی کے باعث بجلی کے بریک ڈاؤن سے کراچی میں پانی کی قلت کا بھی خدشہ پیدا ہوگیا۔ بجلی بند ہونے سے کراچی کو پانی فراہم کرنے والے پمپنگ اسٹیشن بھی بند ہوگئے ہیں۔
میڈیا رپورٹس کے مطابق کراچی میں بجلی کے بریک ڈاؤن کی وجہ سے تمام پمپنگ اسٹیشن کے فیڈرز ٹرپ ہو گئے جس کے باعث شہر میں پانی کی فراہمی معطل ہوگئی ہے۔
میڈیا رپورٹس کے مطابق واٹر بورڈ حکام کا کہنا ہے کہ شہر قائد میں بجلی کے بریک ڈاؤن کے باعث دھابیجی پمپنگ اسٹیشن سے کراچی کو پانی کی فراہمی مکمل طور پر بند ہوگئی ہے۔
کراچی کو 23 پمپس کے ذریعے پانی فراہم کیا جاتا ہے، گجو کینال کے 14 پمپس، کے ٹو کے 3 پمپس اور کے تھری کے 4 پمپس مکمل بند ہوگئے ہیں، ان پمپس سے کراچی کو 540 ملین گیلن فراہم کیا جاتا ہے۔
واٹر بورڈ کا مزید کہنا ہے کہ بجلی کے بریک ڈاؤن کے باعث کراچی کو پانی کی فراہم کرنے والی پائپ لائن نمبر 5 پھٹ گئی ہے جس کی وجہ سے کراچی کو اس وقت پانی کی سپلائی زیرو ہے۔
واٹربورڈ حکام کے مطابق کے الیکٹرک انتظامیہ کو اطلاع دی گئی ہے اور واٹر بورڈ کا کہنا ہے کہ پمپنگ اسٹیشن پربجلی کی بحالی کا کام جاری ہے۔ واٹربورڈ نے شہریوں سے اپیل کی ہے کہ شہری پانی احتیاط سے استعمال کریں۔
