-
-
اینٹی نارکوٹکس فورس (اے این ایف) نے کراچی سمیت مختلف شہروں میں کارروائیوں کے دوران ایک ٹن اور 364 کلو منشیات برآمد کرکے ملزمان کو گرفتار کرلیا گیا ہے۔ ترجمان اینٹی نارکوٹکس فورس کے مطابق 9 مختلف کارروائیوں کے دوران بھاری مقدار میں منشیات برآمد کرکے 8 ملزمان کو گرفتار کیا گیا ہے۔
ایکسپریس نیوز کے مطابق اے این ایف کے ترجمان کا کہنا ہے کہ جناح انٹرنیشنل ائرپورٹ کراچی پر کوئٹہ سے بھیجے گئے پارسل سے 7 کلو چرس برآمد ہوئی۔
باچا خان انٹرنیشنل ائرپورٹ پشاور پر مسافر کے ٹرالی بیگ سے ایک کلو 593 گرام آئس برآمد کی گئی۔ ملزم پشاور سے قطر کے لیے روانہ ہو رہا تھا۔
لاہور کے کوریئر آفس میں برطانیہ کے لیے بک کیے گئے پارسل سے 792 گرام ہیروئن برآمد کرلی گئی۔ موٹروے ٹول پلازہ اسلام آباد کے قریب گاڑی سے 36 کلو افیون اور 28 کلو 800 گرام چرس برآمد کی گئی۔ کارروائی کے دوران 2 ملزمان کو گرفتار کرلیا گیا ہے۔
سنگجانی ٹول پلازہ اسلام آباد کے قریب ٹرک سے 18 کلو افیون اور 12 کلو چرس برآمد کرکے 2 ملزمان کو گرفتار کرلیا گیا۔ شیرشاہ ٹول پلازہ ملتان کے قریب گاڑی سے 4 کلو 800 گرام چرس اور ایک کلو آئس برآمد کرکے ملزم کو حراست میں لے لیا گیا۔
وہاڑی چوک ملتان کے قریب ملزم سے 2 کلو 400 گرام چرس برآمد کی گئی۔ ڈیرہ غازی خان میں ایک کارروائی کے دوران مسافر بس میں سوار ملزم سے 970 گرام آئس برآمدہوئی۔ پشین کے علاقے کلی پانی کئی سے 520 کلو افیون 80 کلو ہیروئن اور 650 کلو چرس برآمد کرلی گئی، جو اسمگلنگ کی غرض سے چھپائی گئی تھی۔
ترجمان کے مطابق کارروائیوں کے دوران گرفتار تمام ملزمان کے خلاف انسدادِمنشیات ایکٹ کے تحت مقدمات درج کر کے مزید تحقیقات شروع کردی گئی ہے۔
