-
-
متحدہ قومی موومنٹ (ایم کیوایم) پاکستان نے کراچی اور حیدرآباد میں پہلے ہی تاخیر کا شکار بلدیاتی الیکشن روکنے کے لیے درخواست دائر کردی۔
ایم کیو ایم پاکستان کی جانب سے دائر درخواست میں مؤقف اختیار کیا گیا ہے کہ بلدیاتی انتخابات سے قبل قانونی پیچیدگیوں کا جائزہ لینا ضروری ہے، ہمیں بھی فریق بنا کر سنا جائے۔
درخواست میں ایم کیو ایم پاکستان نے مؤقف اپنایا ہے کہ سپریم کورٹ کے حکم کے مطابق قانون سازی کے بغیر بلدیاتی ادارے بااختیار نہیں ہو سکتے، بلدیاتی قوانین میں ترامیم تک بلدیاتی الیکشن نہ کروائے جائیں۔
ایم کیو ایم پاکستان کی جانب سے دائر کی گئی درخواست میں کہا گیا ہے کہ بلدیاتی انتخابات سے متعلق کیس کا فیصلہ کرنے سے پہلے ہمارا مؤقف بھی سنا جائے۔
ایم کیوایم پاکستان کا کہنا ہے کہ بدقمستی سے سپریم کورٹ کے فیصلے کے باوجود ہم عملدرآمد کے منتظر ہیں۔ ہمارے پاس دو تہائی اکثریت تھی اسی لئے اس شہر میں ہم اسٹیک ہولڈر ہیں۔
جماعت اسلامی اور پی ٹی آئی کی یہ خوش فہمی ہوسکتی ہے کہ وہ پاپولر ہیں۔ ہم بلدیاتی انتخابات کا التوا نہیں چاہتے لیکن ان حالات میں کوئی بھی ڈلیور نہیں کرسکتا۔
واضح رہے کہ بلدیاتی انتخابات ملتوی کرنے کے خلاف جماعت اسلامی اور پی ٹی آئی نے درخواستیں دائر کر رکھی ہیں اور عدالت نے الیکشن کمیشن، سندھ حکومت اور آئی جی سندھ سے جواب طلب کر رکھا ہے۔
