-
-
وزیراعظم شہباز شریف نے متحدہ قومی موومںٹ (پاکستان) کی رہنما نسرین جلیل کو گورنرسندھ تعینات کرنے کی سمری صدر مملکت ڈاکٹر عارف علوی کو ارسال کردی ہے۔
ایم کیوایم پاکستان کی جانب سے وزیراعظم شہباز شریف کو گورنر سندھ کیلئے 5 نام تجویز کئے گئے تھے جس میں نسرین جلیل، عامرخان، عامرچشتی، وسیم اختر اور کشور زہرہ شامل تھیں۔
میڈیا رپورٹس کے مطابق وزیراعظم شہباز شریف نے نسرین جلیل کا نام گورنرسندھ کیلئے فائنل کیا ہے اور انہیں گورنرسندھ تعینات کرنے کیلئے سمری بھی صدر پاکستان کو بھجوادی ہے۔
صدرمملکت ڈاکٹرعارف علوی کی منظوری کی صورت میں نسرین جلیل تقریباً 50 برسوں بعد گورنرسندھ تعینات ہونے والی دوسری خاتون گورنر ہوں گی۔
ان سے قبل پاکستان کے پہلے وزیراعظم لیاقت علی خان مرحوم کی اہلیہ رعنا لیاقت علی خان 1973 سے 1975 تک سندھ کی گورنر کی ذمہ داریاں انجام دے چکی ہیں۔
نسرین جلیل لاہور میں پیدا ہوئیں، ان کے والد ظفر الحسن برطانوی دور میں لاہور کے ڈپٹی کمشنر رہے اور بعد ازاں کئی اہم عُہدوں پر فرائض انجام دیئے۔
نامزد خاتون گورنر دو دفعہ سینیٹ کی رُکن منتخب ہوئیں اور کئی کمیٹیوں کی چیئرپرسن بھی رہیں۔ وہ ایم کیو ایم کی ڈپٹی کنوینر رہنے کے علاوہ ایک متحرک کارکن کا کردار بھی بخوبی نبھاتی رہیں۔ انہیں کچھ عرصے کیلئے جیل کی ہوا بھی کھانی پڑی۔
