-
-
کرکٹ کے میدان پر شائقین ایک بار پھر روایتی حریف پاکستان اور بھارت کو مدمقابل دیکھنے کیلئے بے تاب ہیں، ایشیا کپ میں دونوں ٹیمیں 28 اگست کو مدمقابل ہوں گی۔
پاک بھارت میچ کے ٹکٹوں کی پہلے مرحلے میں فروخت کا آغاز ہوا تو صرف تین گھنٹے میں ہی تمام ٹکٹ فروخت ہوگئے۔ شائقین مزید ٹکٹوں کے دستیاب ہونے کے منتظر ہیں۔
غیر ملکی خبررساں ایجنسی کے مطابق انتظامیہ کا کہنا ہے کہ پلاٹینم لسٹ میں شامل ٹکٹیں جلد فروخت کے لیے پیش کی جائیں گی اور توقع ہے کہ وہ بھی قبل از وقت فروخت ہو جائیں گی۔
دوسری جانب ایشیا کپ کے دیگر میچز کے لیے ٹکٹس کی فروخت جاری ہے جبکہ سب سے کم قیمت کے ٹکٹ کی مالیت تقریبا ڈھائی ہزار درہم ہے۔
ایشین کرکٹ کونسل (اے سی سی) نے اعلان کیا تھا کہ ٹکٹوں کی فروخت پیر کو ہو گی تاہم کونسل نے وقت کا تعین نہیں کیا تھا جس کے باعث شائقین صبح سے ہی ویب سائٹ پر آن لائن بکنگ کا انتظار کر رہے تھے۔
واضح رہے کہ ایشیا کپ کا آغاز 27 اگست سے ہو رہا ہے جبکہ پاکستان اور بھارت کی ٹیمیں 28 اگست کو مدمقابل ہوں گی۔ پاکستان اور بھارت کے درمیان میچ دبئی کرکٹ اسٹیڈیم میں شیڈول ہے۔
پاکستان نے گزشتہ برس اسی دبئی کے میدان پر ٹی ٹوئنٹی ورلڈکپ میں بھارت کو 10 وکٹوں سے شکست دی تھی۔
