-
-
ملک کے بیشتر حصوں میں سیلاب اور بارشوں سے بڑے پیمانے پر فصلیں تباہ ہوگئیں اور ملک میں غذائی اجناس کی قلت کا خدشہ پیدا ہوگیا ہے۔وفاقی کابینہ نے قلت کو پورا کرنے کیلئے ایران اور افغانستان سے پیاز، ٹماٹر کی درآمد کی منظوری دے دی۔
وزیر تجارت نوید قمر نے بتایا کہ وفاقی کابینہ سے سرکولیشن سمری کے ذریعے منظوری لی گئی البتہ بھارت سے ٹماٹر اور پیاز کی درآمد کا فیصلہ نہیں ہوا۔
انہوں نے کہا کہ مارکیٹ میں سبزیوں کی قیمتوں میں اضافے کی وجہ سے دباؤ ہے، قیمتوں میں استحکام کیلئے دو ملکوں سے درآمد کی اجازت دی ہے جب کہ ٹماٹر اور پیاز کی درآمد کیلئے ٹیکس چھوٹ دی جائے گی۔
وزیر تجارت کا کہنا تھا کہ ایران اور افغانستان سے درآمد نجی شعبہ کرے گا جس میں حکومت سہولت کار ی کا کردار ادا کرے گی۔
انہوں نے مزید کہا کہ بھارت سے درآمد سے متعلق باتیں سامنے آرہی ہیں اس حوالے سے فیصلہ تمام اسٹیک ہولڈرزسے مشاورت کے بعد کیا جائےگا، یہ بھی دیکھا جائے گا کہ خارجہ پالیسی پر کیا اثرات پڑیں گے۔
دوسری جانب کابینہ نے پیاز اور ٹماٹر پر ٹیکس چھوٹ کی بھی منظوری دے دی ہے جو 31 دسمبر 2022 تک ہوگی۔
