-
-
امیر جماعت اسلامی کراچی حافظ نعیم الرحمان کا کہنا ہے کہ اہل کراچی کے حقوق کے لیے پیش رفت پر ایم کیو ایم قیادت کے کانوں سےدھواں نکل رہا ہے۔ کراچی میں ریلی کے شرکاء سے خطاب کرتے ہوئے حافظ نعیم الرحمان نے کہا کہ پی ٹی آئی والے بھی ساڑھے تین سال میں کراچی کے لئے کچھ نہ کرسکے۔
حافظ نعیم الرحمان نے کہا کہ پی ٹی آئی والے ناقص کارکردگی چھپانے کے لیے جماعت اسلامی کو نشانہ بنا رہے ہیں۔ جماعت اسلامی نے وہ بلدیاتی اختیارات واپس لئے ہیں جو ایم کیو ایم نے چھین کر سندھ حکومت کو دے دیے تھے۔
امیر جماعت اسلامی کراچی نے کہا کہ اہل کراچی کے حقوق کے لیے ہماری جدوجہد جاری رہے گی، ہم وفاق سے بھی کراچی کا حق لیں گے۔ حافظ نعیم الرحمان نے کہا کہ ادھورے منصوبوں کے افتتاح سے کراچی کے گمبھیر مسائل حل نہیں ہوں گے، کراچی کی حق تلفی اور ظلم و زیادتی میں صوبے کے ساتھ وفاق بھی شامل ہے۔
واضح رہے کہ سندھ ترمیمی بلدیاتی قانون 2021ء میں تبدیلی کے لیے جماعتِ اسلامی اور حکومت سندھ کے درمیان گذشتہ دو روز قبل معاہدہ طے پایاتھا، جس کے بعد جماعت اسلامی نےسندھ اسمبلی کے باہر 29 روز تک جاری رہنے والا دھرنا ختم کردیا تھا۔
