-
-
ملتان سے کراچی آنے والی ٹرین زکریا ایکسپریس میں ایک خاتون کے ساتھ اجتماعی زیادتی کی تصدیق ہوگئی ہے، جس کے بعد تفتیش کا آغاز کردیا گیا ہے۔ ملزمان کی گرفتاری کے احکامات بھی جاری کردئے گئے۔
پولیس کا کہنا ہے کہ متاثرہ خاتون کا جناح اسپتال میں میڈیکل کروایا گیا، ملزمان کی گرفتاری کے لیے تفتیشی ٹیم ملتان جائیں گی۔ ملزمان کی گرفتاری کے لئے ٹرین انتظامیہ سے رابطہ کرلیا گیا ہے۔
اورنگی ٹاؤن کراچی کی رہائشی خاتون کو چلتی ٹرین کے دوران ٹکٹ چیکر ، انچارج اور مزید ایک شخص نے زیادتی کا نشانہ بنایا تھا۔
پاکستان ریلوے کے جاری کردہ اعلامئے کے مطابق افسوسناک واقعہ زکریا ایکسپریس میں پیش آیا جو پرائیوٹ مینجمنٹ ایس ایس آر کے تحت چلائی جارہی ہے۔
زکریا ایکسپریس میں سوار متاثرہ خاتون کو روہڑی اسٹیشن کے بعد عملے میں شامل ٹکٹ چیکر زاہد نے اے سی کمپارٹمنٹ میں بیٹھنے کا کہا جہاں ٹرین مینجر عاقب پہلے ہی موجود تھا۔ زاہد ، عاقب اور عملے کے ایک اور رکن زوہیب نے خاتون کے بداخلاقی کی۔
پاکستان ریلوے کے مطابق ان کی رپورٹ پر مقدمہ درج کیا جا چکا ہے۔ چیف ایگزیکٹو آفیسر پاکستان ریلوے کو سارے واقعے کی رپورٹ پیش کر دی گئی ہے۔ عملے کے ارکان پرائیویٹ شعبہ سے ہیں اور آئی جی ریلوے پولیس نے اس ضمن میں ملزمان کی گرفتاری کے لیے احکامات جاری کر دیے ہیں۔
چیف ایگزیکٹو آفیسر پاکستان ریلوے نے کہا ہے کہ اس سلسلے میں ایکشن ہوتا ہوا نظر آئے گا اور واقعے میں ملوث کسی شخص کو نہیں چھوڑا جائے گا۔
وزیر ریلوے اور چیئرمین ریلوے نے اس واقعہ پر افسوس کا اظہار کیا ہے اور ریلوے انتظامیہ اور ریلوے پولیس کو نامزد ملزمان کی فوری گرفتاری کی ہدایت جاری کی ہیں ۔ انہوں نے پرائیوٹ ٹرینوں میں اس قسم کے واقعات کی روک تھام کو یقینی بنانے کی ہدایت دی ہے
