-
-
عامر لیاقت حسین کی زندگی میں اُن پر شدید تنقید کرنے والی پاکستان کی معروف میزبان اور اداکارہ مشی خان نے اب اُن سے معافی مانگ لی۔
مشی خان نے سوشل میڈیا پر اپنا ایک ویڈیو پیغام میں کہا کہ عامر لیاقت کے انتقال پر بہت افسوس ہوا، اللّہ پاک اُن کے درجات بُلند فرمائے اور گھر والوں کو صبرِ جمیل عطا کرے، آمین۔
مشی خان نے کہا کہ عامر لیاقت حسین اب اس دُنیا میں نہیں ہیں لیکن میں بہت شرمندہ ہوں، میرے دل پر دو دن سے بوجھ تھا جس کی وجہ سے اُن کے لیے کوئی پیغام جاری نہیں کرسکی۔
میں عامر لیاقت حسین کی شخصیت سے بہت متاثر تھی اور جب میں نے اُن کی ویڈیوز دیکھیں تو اپنے جذبات پر قابو نہیں رکھ سکی اور اُنہیں شدید تنقید کا نشانہ بنایا۔
مشی خان کا کہنا تھا کہ میرے دل پر بہت بوجھ ہے، انسان خطا کا پُتلا ہے، مجھ سے بھی غلطی ہوئی، میں اللّٰہ تعالیٰ سے معافی مانگ رہی ہوں، ایک زبردست شخصیت کا یوں اچانک دُنیا سے رخصت ہوجانا تکلیف دہ ہے۔
اُنہوں نے کہا کہ میرے پاس کہنے کو الفاظ نہیں ہیں، میں عامر لیاقت کے تمام چاہنے والوں سے بھی دل سے معافی مانگ رہی ہوں۔ ہم عامر لیاقت حسین کی بااثر شخصیت کو کبھی بھول نہیں سکیں گے۔
